უკრაინის პრეზიდენტი ვოლოდიმირ ზელენსკი კრივოი-როგზე რუსულ სარაკეტო იერიშს გამოეხმაურა. Telegram-ზე გამოქვეყნებულ განცხადებას სახელმწიფოს მეთაურმა ქალაქზე მტრის დარტყმის შედეგების ამსახველი ფოტოებიც დაურთო. 

„ყველა საჭირო სამსახური ადგილზეა. ისინი დაბომბვის შედეგების აღმოსაფხვრელად მუშაობენ და ხალხს ეხმარებიან. არიან დაშავებულები. მათ სამედიცინო დახმარება უტარდებათ. ამ დროისთვის ცნობილია, რომ ამ დარტყმამ, სამწუხაროდ, ოთხი ადამიანის სიცოცხლე შეიწირა. ყველა დაღუპული მშვიდობიანი მოქალაქეა. ვუსამძიმრებ მათ ოჯახებსა და მეგობრებს“, - დაწერა ზელენსკიმ.

მან ხაზგასმით აღნიშნა, რომ ასეთ შეტევებს მსოფლიოში ყველგან ერთი სახელი ჰქვია - ეს არის ტერორი.

პრეზიდენტის თქმით, ასეთი იერიშების შეჩერება შესაძლებელია მხოლოდ მოსკოვზე, რუსულ სისტემაზე საკმარისი ზეწოლით, რათა ისინი იძულებულები გახდნენ, შეწყვიტონ ომი და ტერორი.

„ეს დამოკიდებულია პარტნიორებზე - ამერიკაზე, ევროპაზე, სხვებზე მსოფლიოში. ერთადერთი, რაც დარტყმების სრული და უპირობო შეწყვეტისგან გვაშორებს, არის ომის დასრულებაზე რუსეთის თანხმობის არარსებობა. მხოლოდ მსოფლიო ზეწოლას შეუძლია უზრუნველყოს ასეთი თანხმობა. და ასევე, ყველა ასეთი რუსული დარტყმა ადასტურებს, რომ უკრაინას სჭირდება საკმარისი საჰაერო თავდაცვის სისტემები და რაკეტები, რათა უკრაინაში მყოფი ყველა ადამიანის რუსული ტერორისგან დაცვა შევძლოთ. ამ მიზნით ყველა პარტნიორთან ვმუშაობთ და მადლობას ვუხდით ყველას, ვინც გვეხმარება. ყველას, ვისაც ესმის, რომ რუსეთზე ზეწოლა და უკრაინის სტაბილური მხარდაჭერაა საჭირო“, - აღნიშნა ზელენსკიმ.