უკრაინის პრეზიდენტი, ვოლოდიმირ ზელენსკი რუსეთის საოკუპაციო ძალების მიერ კრივოი-როგზე ბალისტიკური რაკეტით იერიშს სოციალურ ქსელში გამოეხმაურა. 

„რუსული რაკეტა ჩვეულებრივ ქალაქში, უბრალოდ ქუჩაში, ტერიტორიაზე, სადაც საცხოვრებელი კორპუსებია. თავდაპირველად ეს იყო ბალისტიკური დარტყმა. ამ დროისთვის ჩვენ ვიცით 14 დაღუპულის შესახებ, მათ შორის ექვსი ბავშვია. ვუსამძიმრებ ოჯახს და მეგობრებს“, - აცხადებს ზელენსკი. 

ზელენსკიმ აღნიშნა, რომ სამაშველო ოპერაცია გრძელდება. დაზიანდა სულ მცირე ხუთი სახლი.

„ყოველდღე ადამიანები იღუპებიან. რუსეთს არ სურს ცეცხლის შეწყვეტა და ჩვენ ამას ვხედავთ. ამას მთელი მსოფლიო ხედავს. ყოველი რაკეტა, ყოველი თავდასხმა ადასტურებს, რომ რუსეთს მხოლოდ ომი სურს. ამერიკას, ევროპას და მსოფლიოში ყველას აქვს საკმარისი შესაძლებლობა, აიძულონ რუსეთი შეწყვიტოს ტერორი. მშვიდობაა საჭირო“, - აცხადებს ზელენსკი. 

4 აპრილის საღამოს რუსულმა ძალებმა უკრაინის ქალაქ კრივოი-როგზე ბალისტიკური რაკეტით იერიში მიიტანეს, რის შედეგადაც დაიღუპა 14 ადამიანი, მათ შორის არიან ბავშვები. დაშავდა 50-ზე ადამიანი.