უკრაინის პრეზიდენტმა ვოლოდიმირ ზელენსკიმ განაცხადა, რომ ქვეყანა მზად უნდა იყოს ამერიკული იარაღის მიწოდების შესაძლო შეჩერებისთვის, თუმცა ხაზგასმით აღნიშნა, რომ ამის შესახებ ჯერ არანაირი სიგნალი არ არსებობს.

შეერთებული შტატებიდან იარაღის მიწოდების შესაძლო შეჩერების შესახებ კითხვაზე პასუხის გაცემისას ზელენსკიმ განაცხადა: „ჯერჯერობით არ გვაქვს არანაირი მინიშნება იმისა, რომ PURL-ის მეშვეობით [მექანიზმი, რომლის მეშვეობითაც მოკავშირეები ამერიკულ იარაღს უკრაინისთვის ყიდულობენ] იარაღის მოწოდება შეიძლება შეჩერდეს“.

ამავდროულად, მან დასძინა, რომ ამ საკითხს უფრო სტრატეგიულად უნდა მივუდგეთ.

„2023 წელს ჩვენ ჩავატარეთ აღწერა და მაშინ ჩვენს სამხედროებს ვუთხარი, რომ უნდა მოვემზადოთ იმისთვის, რომ აშშ-ის დახმარება შეიძლება შეწყდეს, ან შეზღუდული და ფასიანი იყოს. ჩვენ უნდა გავამრავალფეროვნოთ მარაგი და შევამციროთ გარკვეული მწირი იარაღის, საბრძოლო მასალის და ა.შ. მოხმარება. და ვთქვი, რომ უნდა დავიწყოთ მზადება იმისთვის, რომ გარკვეულ მომენტში შეიძლება მოხდეს ისე, რომ ფულის სანაცვლოდაც კი უკრაინას იარაღს არ მისცენ“, - აღნიშნა ზელენსკიმ.

მისივე თქმით, მას შემდეგ უკრაინამ საარტილერიო ჭურვების ნაცვლად დრონების წარმოებაზე დაიწყო ფოკუსირება. ზელენსკიმ ასევე აღნიშნა, რომ Patriot-ის საჰაერო თავდაცვის სისტემებისთვის განკუთვნილი რაკეტები ყოველთვის ხელმისაწვდომი არ იქნება.

„ამჟამად ახლო აღმოსავლეთში ომია, მაგრამ მოგვიანებით შეიძლება სხვა მიზეზიც იყოს. ჩვენ ყველა ასპექტში საკუთარი დამოუკიდებელი თავდაცვის ინდუსტრია უნდა შევქმნათ. პრინციპში, სწორედ ამას ვაკეთებთ. ჩვენ ანტიბალისტიკური რაკეტების დეფიციტი გვაქვს. ამიტომ, საკუთარი რაკეტების ქონაზე, ან მათ ჩვენს რომელიმე პარტნიორთან ერთად განვითარებაზე უნდა ვიმუშაოთ. ამისთვის იდეები არსებობს“, - ხაზგასმით აღნიშნა ზელენსკიმ.