რუსეთის მასშტაბური საჰაერო იერიშების შედეგების ლიკვიდაცია ამჟამად კიევის ოლქში, სუმის, ხარკოვის, დნეპრისა და ნიკოლაევის ოლქებში მიმდინარეობს. რუსების მთავარი სამიზნე კიევის ოლქის ენერგეტიკული სექტორი იყო, თუმცა დარტყმები ასევე განხორციელდა საცხოვრებელ შენობებსა და სამოქალაქო საწარმოებზე. ამის შესახებ უკრაინის პრეზიდენტი ვოლოდიმირ ზელენსკი Telegram-ზე წერს.

„რუსების მთავარი სამიზნე კიევის ოლქის ენერგეტიკული სექტორი იყო, თუმცა, სამწუხაროდ, ასევე დარტყმები და ზიანი მიადგა ჩვეულებრივ სახლებს, სკოლებსა და სამოქალაქო საწარმოებს. ამჟამად ცნობილია ოთხი ადამიანის დაღუპვის შესახებ. ვუსამძიმრებ მათ ოჯახებსა და მეგობრებს. ბევრი დაშავდა და ადამიანები კვლავ სამედიცინო დახმარებას ითხოვენ“, - დაწერა უკრაინის პრეზიდენტმა.

მისი თქმით, რუსებმა 13-14 მარტის ღამეს უკრაინის მიმართულებით დაახლოებით 430 სხვადასხვა ტიპის დრონი და 68 რაკეტა ისროლეს, მათ შორის 13 ბალისტიკური რაკეტა. წინასწარი მონაცემებით, მათგან 58 უკრაინის საჰაერო თავდაცვის სისტემამ ჩამოაგდო.

ზელენსკიმ ხაზგასმით აღნიშნა, რომ რუსული დარტყმების ყოველი ასეთი ღამე ყველა პარტნიორისთვის შეხსენებაა, რომ საჰაერო თავდაცვის სისტემები და რაკეტები „პრაქტიკულად ყოველდღიური აუცილებლობაა“.

„რაკეტების მიწოდებასთან დაკავშირებით ყველა შეთანხმებას ვერ დაველოდებით — ყველაფერი რაც შეიძლება მალე უნდა შესრულდეს. ჩვენი შეთანხმებები საჰაერო თავდაცვის რაკეტების წარმოების გაზრდის შესახებ კრიტიკული სფეროა და ის 100-პროცენტიან ყურადღებას მოითხოვს“, - ხაზი გაუსვა სახელმწიფოს მეთაურმა.

ზელენსკიმ აღნიშნა, რომ რუსეთი ახლო აღმოსავლეთში ომის გამოყენებას უკრაინის შემდგომი განადგურებისთვის შეეცდება, სწორედ ამიტომ აუცილებელია საფრთხის რეალური დონის გათვალისწინება და შესაბამისად მომზადება.

„ჩვენ, ევროპაში, გვჭირდება საჰაერო თავდაცვის რაკეტების - და განსაკუთრებით ბალისტიკური რაკეტების საწინააღმდეგო - და ყველა სხვა აუცილებელი სისტემის წარმოება, რომელიც საშუალებას მოგვცემს, ნამდვილად დავიცვათ სიცოცხლე, რაც არ უნდა ხდებოდეს მსოფლიოს ნებისმიერ სხვა ნაწილში“, - დასძინა პრეზიდენტმა.