ამერიკული დელეგაციის წარმომადგენლებთან შეხვედრის შემდეგ უკრაინის დელეგაციის ხელმძღვანელმა რუსტემ უმეროვმა უკრაინის პრეზიდენტ ვოლოდიმირ ზელენსკის დიალოგის ძირითადი პარამეტრები გააცნო, - დაწერა უკრაინის ლიდერმა თავის Telegram არხზე.

„დღეს, აშშ-ში გუნდების მუშაობის შემდეგ უკრაინის დელეგაციის ხელმძღვანელმა რუსტემ უმეროვმა დიალოგის ძირითადი პარამეტრების, აქცენტებისა და ზოგიერთი შედეგის შესახებ ანგარიში წარადგინა“, - განაცხადა ზელენსკიმ.

მან აღნიშნა, რომ საუბარი კონსტრუქციული იყო და ყველა საკითხი გულახდილად განიხილეს.

„მნიშვნელოვანია, რომ საუბარი კონსტრუქციული იყო და შეხვედრებზე ყველა საკითხი გულახდილად განიხილებოდა და მიზნად ისახავდა უკრაინის სუვერენიტეტისა და ეროვნული ინტერესების უზრუნველყოფას“, - განაცხადა უკრაინის პრეზიდენტმა.

ზელენსკიმ მადლობა გადაუხადა აშშ-ს, პრეზიდენტ ტრამპის გუნდს და პირადად პრეზიდენტს უკრაინაში ომის დასრულებისთვის დახარჯული დროისა და ძალისხმევისთვის.

„ჩვენ გავაგრძელებთ მუშაობას. მოუთმენლად ველი ჩვენი გუნდის სრულ ანგარიშს ჩვენს პირად შეხვედრაზე“, - დასძინა ზელენსკიმ.

ამავდროულად, აშშ-ის დელეგაციასთან შეხვედრის შემდეგ უკრაინის ეროვნული უსაფრთხოებისა და თავდაცვის საბჭოს მდივანმა რუსტემ უმეროვმა განაცხადა, რომ აშშ მხარს უჭერს უკრაინას ხანგრძლივი მშვიდობის მიღწევის სურვილში.

„ჩვენ მნიშვნელოვან პროგრესს მივაღწიეთ ღირსეული მშვიდობის ხელშეწყობისა და ჩვენი პოზიციების ამერიკულ მხარესთან თანხვედრის კუთხით. ჩვენი ძირითადი მიზნები - უსაფრთხოება, სუვერენიტეტი და მდგრადი მშვიდობა - უცვლელი რჩება და მათ ამერიკული მხარეც იზიარებს“, - დაწერა მან.

უმეროვმა განაცხადა, რომ გაგრძელდება კონსულტაციები და ერთობლივი ჩარჩო გადაწყვეტილების შეთანხმებაზე მუშაობა.