ევროპელი ამომრჩევლები უკრაინაში სამშვიდობოების გაგზავნას ეწინააღმდეგებიან, - წერს The Wall Street Journal.

გაზეთი აღნიშნავს, რომ ბევრი ამომრჩეველი ეწინააღმდეგება ჯარების განლაგებას, რამაც შეიძლება საფრთხე შეუქმნას მათ. ეს განწყობა ყველაზე მეტად გავრცელებულია აღმოსავლეთ ევროპის ქვეყნებში, რომლებსაც არ სურთ ძალების საზღვრებიდან გადამისამართება.

ამგვარად, Insa-ს მიერ გასულ კვირას გერმანიაში ჩატარებულმა გამოკითხვამ აჩვენა, რომ გამოკითხულთა 56% გერმანიის მონაწილეობას ეწინააღმდეგება, რაც გაზაფხულის მაჩვენებელზე მეტია.

საფრანგეთში, რომელიც სამშვიდობო მისიის ერთ-ერთი მთავარი მხარდამჭერია, საზოგადოების მხარდაჭერა საბოლოო სამშვიდობო შეთანხმებაზეა დამოკიდებული და არა ცეცხლის შეწყვეტაზე. Elabe-ს მიერ მარტში ჩატარებული გამოკითხვის თანახმად, გამოკითხულთა 67% მხარს უჭერს ფრანგული ჯარების გაგზავნას, თუ კიევი და მოსკოვი სამშვიდობო შეთანხმებას მიაღწევენ. ასეთი შეთანხმების გარეშე, გამოკითხულთა 68% წინააღმდეგია.

ბრიტანეთის მონაწილეობაც კითხვის ნიშნის ქვეშ რჩება. გამოკითხვების თანახმად, ბრიტანელების უმეტესობა მიესალმება მათი სამხედროების მონაწილეობას ნებისმიერ სამშვიდობო მოლაპარაკებებში, მაგრამ არ სურს რუსეთთან პირდაპირი კონფრონტაციის პროვოცირება.

პოლონეთმა, ასევე, წითელი ხაზი გაავლო უკრაინაში ჯარების გაგზავნასთან დაკავშირებით, რადგან ამტკიცებს, რომ მისმა ჯარებმა შეიძლება კონფლიქტის ესკალაცია მოახდინონ, რაც, შესაძლოა, პოლონეთის ტერიტორიაზეც გადავიდეს.

ამავდროულად, United Surveys-ის მიერ მიმდინარე წლის მარტში ჩატარებული გამოკითხვის თანახმად, გამოკითხულთა 58.5% კატეგორიულად ეწინააღმდეგებოდა უკრაინაში ჯარების გაგზავნას, ხოლო 28%-მა განაცხადა, რომ პოლონეთმა „ალბათ არ უნდა“ გაგზავნოს ჯარები მეზობელ ქვეყანაში.

ევროპელი ოფიციალური პირები აცხადებენ, რომ რთულია საზოგადოების დარწმუნება ჯარების განლაგების აუცილებლობაში აშშ-ის მკაფიო განცხადების გარეშე, რომ ევროპულ ჯარებს მხარდაჭერა ექნებათ. ბოლო კვირების განმავლობაში დიპლომატიური აქტივობის მიუხედავად, ჯერ კიდევ არ არის ნათელი, თუ რისი უზრუნველყოფისთვის არის მზად აშშ.

თუმცა, ბევრი ევროპელი ლიდერი აცხადებს, რომ უკრაინაში ჯარების ყოფნა სასიცოცხლოდ მნიშვნელოვანია ევროპის უსაფრთხოებისთვის და აფრთხილებენ, რომ კიევის დაცემის შემთხვევაში, რუსეთი ევროპის სხვა ნაწილებში შეტევას დაიწყებს. ეს არგუმენტები ევროპის ზოგიერთ ნაწილში, განსაკუთრებით სკანდინავიურ ქვეყნებში - მაგალითად, ნიდერლანდებში, დანიასა და ესტონეთში - უმრავლესობის მხარდაჭერას პოულობს.