„რუსეთის მიერ უკრაინაზე დარტყმა ევროპაზე დარტყმაა, პრეზიდენტ ტრამპზე დარტყმაა“, – ამის შესახებ უკრაინის პრეზიდენტმა ვოლოდიმირ ზელენსკიმ ყოველდღიური მიმართვისას ისაუბრა.

„ეს დარტყმა ნათლად აჩვენებს, რომ რუსეთის მიზნები რეალურად არ შეცვლილა. მათ ბრძოლა სურთ და ისინი არა მხოლოდ ჩვენს ხალხს, ჩვენს ქალაქებს ესხმიან თავს, არამედ მსოფლიოში ყველას, ვინც მშვიდობას ეძებს. ეს არის დარტყმა ევროპაზე, ეს ასევე დარტყმაა პრეზიდენტ ტრამპზე. ვაშინგტონში გვესმოდა, რომ პუტინი, სავარაუდოდ, მზადაა ომის დასასრულებლად – ლიდერების დონეზე შესახვედრად და ძირითადი საკითხების გადასაჭრელად, თუმცა ის მშვიდობისკენ რეალური ნაბიჯების ნაცვლად ბალისტიკას ირჩევს. ის ბავშვებს კლავს, რათა არ ისაუბროს იმაზე, თუ როდის და როგორ იქნება მშვიდობა. პრობლემა ის არის, რომ მას არ ეშინია იმ ლიდერებზე დარტყმის, რომლებსაც რაღაცას ჰპირდება. ეს მხოლოდ ამერიკის პრეზიდენტს არ ეხება. ეს ეხება იმ ქვეყნებსაც, რომლებიც პუტინთან ვაჭრობენ“, – განაცხადა ზელენსკიმ.

უკრაინის პრეზიდენტის თქმით, ზოგიერთი ქვეყანა, მაგალითად, ჩინეთი, ინდოეთი, აზიისა და ლათინური ამერიკის სხვა ქვეყნები, კვლავ ვაჭრობენ რუსეთთან.

„რუსეთი უბრალოდ მათ თანამზრახველებად ხდის ასეთი დარტყმებით, ადამიანების ასეთი მკვლელობით. დღეს ამ რუსულ ბოროტებაზე ბევრი პრინციპული რეაქცია იყო – თანაგრძნობა ჩვენი ხალხის, ჩვენი ქვეყნის მიმართ. მადლობელი ვარ ყველასი, ვინც ახლა იგრძნო, თუ რამდენად არაადამიანურია ეს დარტყმა. ახლა, როდესაც ყველა ასე ცდილობს ომის დასრულებას, რუსეთი ურტყამს ჩვეულებრივ სახლებს, ჩვეულებრივ ქალაქებს – მიზანმიმართულად, გააზრებულად ამატებს რაკეტებს, რათა მეტი დარტყმა იყოს. მსოფლიოს სჭირდება მკაფიო პასუხი ამ ბოროტებაზე. არ არსებობს ვადები, რომლებსაც პუტინი არ დაარღვევდა. არ არსებობს დიპლომატიური შესაძლებლობები, რომლებიც რუსეთის გამო არ გაფუჭდებოდა. საჭიროა ძლიერი ნაბიჯები. მადლობას ვუხდი ყველას, ვინც ამას ხვდება. სანქციებია საჭირო. საჭიროა ტარიფები მათთვის, ვინც ამა თუ იმ გზით აფინანსებს ამ ომს“, – განაცხადა ზელენსკიმ.

ცნობისთვის, რუსეთმა ღამის განმავლობაში უკრაინაზე მასირებული იერიში 629 რაკეტისა და დრონის გამოყენებით მიიტანა, საიდანაც საჰაერო თავდაცვამ 589 გაანადგურა. უკრაინის დედაქალაქზე რუსეთის მასირებული იერიშის შედეგად დაღუპულია - 19, ხოლო დაშავებულია 52 ადამიანი.