უკრაინა არ იცავს უნგრეთს არავისგან და არაფრისგან. ჩვენ ასეთი რამ არ გვითხოვია და არასოდეს მოვითხოვთ, - ამის შესახებ უნგრეთის პრემიერ-მინისტრი ვიქტორ ორბანი სოციალურ ქსელში წერს.

ორბანი ზელენსკის ახსენებს დახმარებებს, რაც უნგრეთმა უკრაინას გაუწია.

„დღეს უკრაინის პრეზიდენტი ვოლოდიმირ ზელენსკი ბრიუსელში გამართულ კონფერენციაზე კიდევ ერთხელ დაესხა თავს უნგრეთს და უნგრეთის მთავრობას სხვადასხვა ბრალდებით. მოდით, ფაქტებს შევხედოთ. უნგრეთმა მიიღო ლტოლვილები უკრაინიდან; მოხდა 14 მილიონზე მეტი საზღვრის გადაკვეთა ომის დაწყებიდან; ჩვენს ქვეყანაში ფუნქციონირებს სამი უკრაინული სკოლა; ვუვლიდით დაჭრილ ჯარისკაცებსა და ბავშვებს; ვუმასპინძლეთ ათი ათასზე მეტ უკრაინელ ბავშვს უნგრეთის ბანაკებში; ვამზადებდით სამედიცინო პერსონალს; აღვადგინეთ სკოლები და საბავშვო ბაღები უკრაინაში; გასულ წელს ვიყავით ელექტროენერგიის უდიდესი მიმწოდებელი უკრაინისთვის. ჩვენ დღემდე სულ დავხარჯეთ 200 მილიონი ევრო უკრაინელებისთვის ჰუმანიტარულ დახმარებაზე. სამწუხაროა, თუ ეს პრეზიდენტ ზელენსკისთვის არაფერს ნიშნავს“, - წერს ორბანი.

ორბანი უკრაინის პრეზიდენტს, ასევე, ახსენებს, რომ თანხები, რასაც უკრაინა ევროკავშირისგან იღებს, უნგრულ ფულსაც შეიცავს.

„ჩვენ არ ვართ მოხარულები ამით, მაგრამ ეს ფაქტია“, - აღნიშნავს უნგრეთის პრემიერ-მინისტრი.

ამასთან, ორბანი უარყოფს მინიშნებას, თითქოს უნგრეთს უკრაინის ვალი აქვს.

„უკრაინა არ იცავს უნგრეთს არავისგან და არაფრისგან. ჩვენ ასეთი რამ არ გვითხოვია და არასოდეს მოვითხოვთ. უნგრეთის უსაფრთხოება უზრუნველყოფილია ჩვენი ეროვნული თავდაცვის შესაძლებლობებითა და ნატოთი, რომლის წევრიც უკრაინა (საბედნიეროდ) არ არის.

დაბოლოს, მინდა, შევახსენო უკრაინის პრეზიდენტს, რომ ქვეყნის ევროკავშირში გაწევრიანების შესახებ გადაწყვეტილებას წევრი სახელმწიფოები ერთსულოვნად იღებენ. ეს ნიშნავს, რომ ყველა წევრ სახელმწიფოს აქვს სუვერენული უფლება, მხარი დაუჭიროს ან წინააღმდეგი წავიდეს ახალი წევრის მიღებაზე.

უნგრეთი არ უჭერს და არც დაუჭერს მხარს უკრაინის ევროკავშირში წევრობას, რადგან ეს ომს შემოიტანს ევროპაში და უნგრელების ფულს უკრაინაში წაიღებს. ჩვენ გვჯერა, რომ ევროკავშირმა უკრაინასთან ევროკავშირში გაწევრიანების გარეშე უნდა დაამყაროს სტრატეგიული პარტნიორობა. ეს არის ჩვენი წინადადება. ამ პოზიციას მომავალშიც დავიცავთ, რისი სრული უფლებაც გვაქვს“, - წერს ორბანი.

Today, President @ZelenskyyUa once again attacked Hungary and the Hungarian government at a conference in Brussels with a variety of accusations.

So let us look at the facts.

As for support: Hungary has taken in refugees from Ukraine, there have been more than 14 million border…

— Orbán Viktor (@PM_ViktorOrban) November 4, 2025