აშშ-ის ვიცე-პრეზიდენტმა ჯ.დ. ვენსმა განაცხადა, რომ ისრაელმა შესაძლოა, „ცოტათი შეიკავოს თავი“ ლიბანზე დარტყმებისგან და დასძინა, რომ უნგრეთიდან შეერთებულ შტატებში დაბრუნებისას Air Force Two-ის ბორტზე სრულ ანგარიშს მიიღებს.

ვენსმა ჟურნალისტებს განუცხადა, რომ თუ ისრაელი ლიბანთან დაკავშირებით დამოკიდებულებას შეარბილებს, ეს არ მოხდება იმიტომ, რომ ეს ცეცხლის შეწყვეტის პირობაა, არამედ იმიტომ, რომ ისრაელი შეერთებული შტატების მიმართ კეთილსინდისიერად არის განწყობილი და სურს, რომ ირანთან მოლაპარაკებები „წარმატებით“ დასრულდეს.

„მომისმინეთ, თუ ირანს სურს, რომ ეს მოლაპარაკებები ჩაიშალოს კონფლიქტის გამო, სადაც ისინი ლიბანის გამო იბრძვიან - რასაც მათთან არაფერი აქვს საერთო - და რომლის შესახებაც შეერთებულმა შტატებმა არასდროს თქვა, რომ ეს ცეცხლის შეწყვეტის შეთანხმების ნაწილი იყო, ეს საბოლოო ჯამში მათი არჩევანია“, - აღნიშნა ვენსმა.

აშშ-ის ვიცე-პრეზიდენტმა განაცხადა, რომ, მისი აზრით, ირანთან „ლეგიტიმური გაუგებრობა“ მოხდა, მან შეცდომით გაიგო, რომ ლიბანი ცეცხლის შეწყვეტის შეთანხმებაში ჩაერთვებოდა.

„ვფიქრობ, ირანელებს ეგონათ, რომ ცეცხლის შეწყვეტა ლიბანსაც მოიცავდა და ეს ასე არ მოხდა. ჩვენ არასდროს მიგვიცია ეს დაპირება. ჩვენ არასდროს მიგვითითებია, რომ ასე მოხდებოდა. ჩვენ ვთქვით, რომ ცეცხლის შეწყვეტა ორიენტირებული იქნებოდა ირანზე და აშშ-ის მოკავშირეებზე, როგორც ისრაელზე, ასევე სპარსეთის ყურის არაბულ სახელმწიფოებზე“, - განაცხადა ვენსმა.