უკრაინის საგარეო საქმეთა სამინისტროს წარმომადგენელმა გეორგი ტიხიმ განაცხადა, რომ რუსეთი ბლოკავს სამშვიდობო პროცესს, თუმცა, ამის მიუხედავად, შეერთებულ შტატებში უკრაინულ და ამერიკულ დელეგაციებს შორის ბოლო დროს გამართული მოლაპარაკებები მნიშვნელოვანი იყო.

როგორც ცნობილია, 21 მარტს უკრაინის მოლაპარაკების ჯგუფი მაიამიში იმყოფებოდა, სადაც ომის დასრულების საკითხზე აშშ-ის პრეზიდენტის სპეციალურ წარმომადგენლებთან შეხვედრა გაიმართა.

„საერთო ჯამში, უკრაინულ და ამერიკულ დელეგაციებს შორის მოლაპარაკებები მნიშვნელოვანი იყო. თუმცა პროგრესი არ ყოფილა, მხოლოდ რუსული მხარის პოზიციის გამო. რუსეთს არ სურს დიპლომატები, არ სურს მონაწილეობა და არ სურს ამ პროცესის წინსვლა“, - აღნიშნა ტიხიმ.

მისი თქმით, რუსეთი ფსონს ომზე დებს. „და როდესაც მასზე ზეწოლა სუსტდება, ის ნამდვილად კარგავს მოტივაციას და ინტერესს მშვიდობისკენ სვლის მიმართ“, - ხაზგასმით აღნიშნა მან.

თუმცა, ტიხის თქმით, მუშაობა გრძელდება. მან განაცხადა, რომ უკრაინა დაინტერესებულია უკრაინას, აშშ-სა და რუსეთს შორის სამმხრივი შეხვედრით, ასევე, მაღალი დონის შეხვედრების ჩატარებით.

„უკრაინას აქვს საკმაოდ მისაღები და განხორციელებადი წინადადებები ამ პროცესში ყველაზე მგრძნობიარე და რთული საკითხების გადასაჭრელადაც კი. თუმცა ყველაფერი რუსეთზეა დამოკიდებული“, - განაცხადა მან.

გარდა ამისა, ტიხიმ ხაზგასმით აღნიშნა, რომ ჰუმანიტარულ საკითხებზე ყოველდღიური მუშაობა გრძელდება.

„ჩვენ ვსაუბრობთ პატიმრების გაცვლაზე. ეს სამუშაო მიმდინარეობს პირდაპირი შეხვედრების მიღმაც კი, რადგან უკრაინისთვის ადამიანების დაბრუნება პრიორიტეტულია“, - დასძინა უკრაინის საგარეო უწყების წარმომადგენელმა.