„უკიდურესად საშიში პრეცედენტი ევროპისთვის“ - ზელენსკი პოლონეთის საჰაერო სივრცეში რუსული დრონების შეჭრაზე
უკრაინის პრეზიდენტმა ვოლოდიმირ ზელენსკიმ რუსული დრონების მეზობელ პოლონეთში შეჭრას ევროპისთვის უკიდურესად სახიფათო პრეცედენტი უწოდა. ამის შესახებ სახელმწიფოს მეთაურის Telegram-ზე გამოქვეყნებულ განცხადებაშია ნათქვამი.
„მოსკოვი ყოველთვის ცდის შესაძლებლობების საზღვრებს და თუ ძლიერ რეაქციას არ წააწყდება, ესკალაციის ახალ დონეზე რჩება. დღეს კიდევ ერთი ესკალაციური ნაბიჯი იყო - რუსულ-ირანული „შაჰედები“ მოქმედებდნენ პოლონეთის საჰაერო სივრცეში, ნატოს საჰაერო სივრცეში“, - აღნიშნა ზელენსკიმ.
მან ხაზგასმით აღნიშნა, რომ საუბარი არ არის ერთ „შაჰედზე“, რასაც შეიძლება შემთხვევითობა ეწოდოს, არამედ სულ მცირე 8 მოიერიშე დრონზე, რომლებიც პოლონეთისკენ იყო მიმართული.
„ევროპისთვის უკიდურესად სახიფათო პრეცედენტი. იქნება თუ არა შემდგომი ნაბიჯები, მთლიანად დამოკიდებულია კოორდინაციასა და რეაგირების სიძლიერეზე. რუსებმა უნდა იგრძნონ შედეგები. რუსეთმა უნდა იგრძნოს, რომ ომის გაფართოება შეუძლებელია და ის უნდა დასრულდეს“, - ხაზგასმით აღნიშნა უკრაინის პრეზიდენტმა.
ზელენსკი მიიჩნევს, რომ სანქციების პაუზა ძალიან დიდი ხანია, გრძელდება. მისი თქმით, რუსეთისა და მისი თანამზრახველებისთვის შეზღუდვების გადადება მხოლოდ დარტყმების სიმკაცრის გაზრდას ნიშნავს.
„რუსეთის შესაკავებლად საკმარისი იარაღი გვჭირდება. ჩვენ ძლიერი პასუხი გვჭირდება და ეს მხოლოდ ყველა პარტნიორის ერთობლივი პასუხი შეიძლება იყოს: უკრაინის, პოლონეთის, ყველა ევროპელის, შეერთებული შტატების. მადლობა ყველას, ვინც გვეხმარება“, - ხაზგასმით აღნიშნა პრეზიდენტმა.
ამასთან, მან გამოაქვეყნა ფოტოები, რომლებიც 9-10 სექტემბრის ღამეს რუსული რაკეტებისა და დრონების მიერ უკრაინის ტერიტორიაზე განხორციელებული დარტყმების შედეგებს ასახავს. როგორც ზელენსკი აღნიშნავს, ღამით დაბომბვის ქვეშ უკრაინის 15 ოლქი მოექცა. ცნობილია, რომ ჟიტომირის ოლქში დაბომბვის შედეგად ერთი ადამიანი დაიღუპა.
„ამჟამად მაშველები მუშაობენ ვოლოჩისკში, ხმელნიცკის ოლქში, სადაც რუსებმა რაკეტით ჩვეულებრივი სამკერვალო სახელოსნო დაბომბეს. ამ დროისთვის ცნობილია სამი დაშავებულის შესახებ. ეს მხოლოდ ერთ-ერთი ადგილია, სადაც რუსებმა დღეს მასშტაბური დარტყმა განახორციელეს: დაახლოებით 415 სხვადასხვა ტიპის დრონი და 40-ზე მეტი ფრთოსანი და ბალისტიკური რაკეტა“, - წერს ზელენსკი.
