უკრაინაში მშვიდობა სულ უფრო და უფრო ახლოვდება. მეტიც, ბოლო მოლაპარაკებების მთავარი შედეგი იყო აშშ-ის მიერ უსაფრთხოების გარანტიების გამოცხადება, მათ შორის უკრაინაში ამერიკული ჯარების განლაგების შესახებ. ამის შესახებ პოლონეთის პრემიერ-მინისტრმა დონალდ ტუსკმა ევროპელ ლიდერებთან სატელეფონო კონფერენციის შემდეგ განაცხადა.

„ჩვენ შევაფასეთ უკრაინის, აშშ-ის, ევროკავშირისა და კანადის ლიდერების მონაწილეობით სერიოზული მოლაპარაკებების პირველი ფაზის შედეგები. მშვიდობა ჰორიზონტზეა. ეჭვგარეშეა, რომ მოხდა მოვლენები, რომლებიც იმედს იძლევა, რომ ეს ომი სწრაფად დასრულდება. თუმცა ეს მაინც იმედია; ჩვენ ჯერ კიდევ შორს ვართ 100%-იანი დარწმუნებისაგან“, - განუცხადა მან ჟურნალისტებს.

ტუსკის თქმით, აშშ-მა განაცხადა, რომ მზადაა, მონაწილეობა მიიღოს უკრაინის უსაფრთხოების გარანტიებში სამშვიდობო შეთანხმების ხელმოწერის შემდეგ. მან აღნიშნა, რომ უსაფრთხოების გარანტიები მოიცავს ამერიკული ჯარების ყოფნას, მაგალითად, საზღვარზე, ან უკრაინასა და რუსეთს შორის შეხების ხაზის გასწვრივ.

„ეს ცალსახა განცხადებები პირველია. ვნახოთ, რამდენად თანმიმდევრულები იქნებიან ჩვენი პარტნიორები ატლანტის ოკეანის მეორე მხარეს, თუმცა ეს იმედს გვაძლევს, რომ მოლაპარაკებები წარმატებული იქნება. ომის დასრულებას წარმატებად მივიჩნევ“, - ხაზგასმით აღნიშნა პოლონეთის პრემიერ-მინისტრმა.