აშშ-ის პრეზიდენტმა დონალდ ტრამპმა განაცხადა, რომ ის და მექსიკის პრეზიდენტი კლაუდია შეინბაუმი შეთანხმდნენ, გაახანგრძლივონ მათი ამჟამინდელი შეთანხმება. შესაბამისი განცხადება ტრამპმა პლატფორმა Truth Social-ზე გამოაქვეყნა. 

„ახლახან დავასრულე სატელეფონო საუბარი მექსიკის პრეზიდენტთან კლაუდია შეინბაუმთან, რომელიც ძალიან წარმატებული იყო იმ თვალსაზრისით, რომ ჩვენ სულ უფრო და უფრო ვეცნობით და ვუგებთ ერთმანეთს.

მექსიკასთან შეთანხმების სირთულეები გარკვეულწილად განსხვავდება სხვა ქვეყნებისგან, როგორც საზღვრის პრობლემების, ასევე აქტივების გამო. ჩვენ შევთანხმდით, რომ 90 დღით გავაგრძელოთ ზუსტად იგივე შეთანხმება, რაც ბოლო მოკლე პერიოდის განმავლობაში გვქონდა, კერძოდ, მექსიკა გააგრძელებს ფენტანილის 25%-იანი ტარიფის, ავტომობილებზე 25%-იანი ტარიფის და ფოლადზე, ალუმინსა და სპილენძზე 50%-იანი ტარიფის გადახდას“, - დაწერა ტრამპმა.

მისივე თქმით, მექსიკა დათანხმდა, დაუყოვნებლივ გააუქმოს არასატარიფო სავაჭრო ბარიერები.

„ჩვენ მომდევნო 90 დღის განმავლობაში ვესაუბრებით მექსიკას იმ მიზნით, რომ ხელი მოვაწეროთ სავაჭრო შეთანხმებას 90-დღიანი პერიოდის, ან უფრო მეტის განმავლობაში“, - აღნიშნა ტრამპმა.

ამერიკელი ლიდერის თქმით, საზღვარზე თანამშრომლობა გაგრძელდება უსაფრთხოების ყველა ასპექტთან დაკავშირებით, მათ შორის ნარკოტიკებთან, ნარკოტიკების გავრცელებასთან და შეერთებულ შტატებში არალეგალურ იმიგრაციასთან დაკავშირებით.