აშშ-ის პრეზიდენტმა დონალდ ტრამპმა ისრაელთან ერთად ირანის წინააღმდეგ დაწყებული სამხედრო ოპერაციის ოთხი მიზანი დაასახელა. კერძოდ, ესენია: ქვეყნის სარაკეტო შესაძლებლობების განადგურება, მისი საზღვაო ძალების განადგურება, მისი ბირთვული ამბიციების დასრულება და ტერორისტების შეიარაღებაში მისთვის ხელის შეშლა.

„ჩვენი მიზნები ნათელია“, - განაცხადა ტრამპმა თეთრი სახლის აღმოსავლეთ ოთახში სიტყვით გამოსვლისას. 

„პირველ რიგში, ჩვენ ვანადგურებთ ირანის სარაკეტო შესაძლებლობებს - და თქვენ ხედავთ, რომ ეს ყოველ საათში ხდება - და მათ შესაძლებლობას, აწარმოონ სრულიად ახალი და საკმაოდ კარგი რაკეტები. მეორეც, ჩვენ ვანადგურებთ მათ საზღვაო ფლოტს. ჩვენ უკვე 10 გემი გავანადგურეთ. ისინი ზღვის ფსკერზე არიან“, - აღნიშნა ტრამპმა.

პრეზიდენტმა განაცხადა, რომ დარტყმები, რომლებიც 28 თებერვალს, გამთენიისას დაიწყო და ამჟამად გრძელდება, უზრუნველყოფს, რომ ირანი „ვერასდროს შეძლებს ბირთვული იარაღის ქონას“.

მისი თქმით, რეჟიმი „მისი ლეგიტიმურად მიღების გზაზე“ იყო აშშ-ის ყოფილი პრეზიდენტის ბარაკ ობამას მიერ ხელმოწერილი შეთანხმების თანახმად, საიდანაც ტრამპმა აშშ პირველი ვადის განმავლობაში გაიყვანა.

„და ბოლოს, ჩვენ უზრუნველყოფთ, რომ ირანის რეჟიმმა ვერ შეძლოს ტერორისტული არმიების შეიარაღების, დაფინანსებისა და საზღვრებს გარეთ მათი ხელმძღვანელობის გაგრძელება“, - განაცხადა ტრამპმა.

აშშ-ის პრეზიდენტის თქმით, ირანთან შეთანხმების შესახებ მოლაპარაკებები შეფერხებით მიმდინარეობდა და საბოლოოდ სამხედრო დარტყმების წინ ჩიხში შევიდა.

„ვფიქრობდით, რომ შეთანხმებას მივაღწიეთ, მაგრამ შემდეგ მათ უკან დაიხიეს. ისინი დაბრუნდნენ და ჩვენც გვეგონა, რომ შეთანხმებას მივაღწიეთ და უკან დაიხიეს. მე ვთქვი, თქვენ არ შეგიძლიათ ამ ხალხთან გამკლავება - ეს სწორი გზით უნდა გააკეთოთ“, - აღნიშნა ტრამპმა.