აშშ-ის პრეზიდენტი დონალდ ტრამპი აცხადებს, რომ ირანში ყველაზე მასშტაბური დარტყმების ტალღა ჯერ კიდევ წინ არის.

„ჩვენ ჯერ კიდევ არ დაგვიწყია მათზე ძლიერი დარტყმა. დიდი ტალღა ჯერ არ დაწყებულა. დიდი ტალღა მალე მოვა“, - განუცხადა ტრამპმა CNN-ს.

როდესაც ტრამპს ოპერაცია „ეპიკური მრისხანების“ ვადების შესახებ ჰკითხეს, მან უპასუხა: „არ მინდა, რომ ეს ძალიან დიდხანს გაგრძელდეს. ყოველთვის მეგონა, რომ ოთხ კვირას გასტანდა. და ჩვენ გრაფიკს ოდნავ ვუსწრებთ“.

ამასთან, ტრამპმა განაცხადა, რომ აშშ ირანელი ხალხისთვის სამხედრო სფეროს მიღმა ნაბიჯებს დგამს, თუმცა დეტალები არ დააკონკრეტა.

მისი თქმით, კონფლიქტში „ყველაზე დიდი სიურპრიზი“ ჯერჯერობით არაბ მეზობლებზე ირანის თავდასხმები იყო.

„ჩვენ [დარტყმის მიმღებ არაბულ სახელმწიფოებს] ვუთხარით: „ეს გვაქვს“ და ახლა მათ ბრძოლა სურთ. ისინი აგრესიულად იბრძვიან. ისინი ძალიან მცირე ჩართულობას აპირებდნენ და ახლა დაჟინებით მოითხოვენ მონაწილეობას“, - განაცხადა ტრამპმა.

აშშ-ის პრეზიდენტის თქმით, ხამენეი საუზმეზე თავის ახლო წრეს ხვდებოდა, როდესაც თეირანში მის რეზიდენციაზე დარტყმები განხორციელდა, რადგან მას სჯეროდა, რომ ისინი დღისით თავდასხმისგან დაცულები იყვნენ.

„49 ლიდერია ლიკვიდირებული. ჩვენ ვიფიქრეთ, რომ ირანის ლიდერებისგან თავის დაღწევას ოთხი კვირა დასჭირდებოდა. და თუ ისინი იმალებიან, ეს ყოველთვის ოთხ კვირაზე ბევრად მეტია. და ისინი იმალებოდნენ. შოკირებული ვიყავით, როდესაც გავიგეთ, რა ხდებოდა. ზუსტად ვიცოდით, რა ხდებოდა და სად“, - განუცხადა ტრამპმა Fox News-ს.

რაც შეეხება იმას, თუ ვინ შეიძლება იყოს ირანის ახალი ლიდერი, ტრამპმა თქვა, რომ არ იცის. „შესაძლოა, გაუმართლოთ და ისეთი ადამიანი დაინიშნოს, ვინც იცის, რას აკეთებს“.

„მათ არ იციან, ვინ ლიდერობს. ეს ცოტათი უმუშევრობის ზღვარს ჰგავს“, - აღნიშნა ტრამპმა.

ამ თვის დასაწყისში გამოცემა The New York Times-მა გამოაქვეყნა ინფორმაცია, რომ ხამენეიმ შეიმუშავა დეტალური გეგმები მისი მემკვიდრეობისა და საგანგებო სარდლობის ჯაჭვისთვის, იმ შემთხვევისთვის, თუ ის, ან სხვა მაღალი რანგის ლიდერები აშშ-ის, ან ისრაელის პოტენციური დარტყმების შედეგად დაიღუპებოდნენ, რითაც კრიზისის მართვა ირანის ეროვნული უსაფრთხოების უმაღლესი საბჭოს მდივანს ალი ლარიჯანის დაევალა.