აშშ-ის პრეზიდენტის დონალდ ტრამპის ადმინისტრაციამ გადაწყვეტილება მიიღო, შეამციროს 5 მილიარდი დოლარის ოდენობის საგარეო დახმარება, რომელიც მიმდინარე წელს კონგრესმა გამოყო. აღნიშნულის შესახებ „ბიბისი“ იტყობინება. 

როგორც მედიასაშუალება წერს, თეთრი სახლის ლიდერი იყენებს იშვიათ მექანიზმს, რომელიც ცნობილია როგორც „ფარული რეზისია“ ანუ მოთხოვნა, უკან გაიწვიონ უკვე დამტკიცებული სახსრები იმგვარად, რომ კონგრესის ჩარევის გარეშე, საბიუჯეტო წლის ამ ეტაპზე გამოყოფილი თანხები გაუქმდება. 

„ფარული რეზესია“ თითქმის 50 წელია შეერთებულ შტატებში არ გამოუყენებიათ“, - იტყობინება მედიასაშუალება. 

შეკვეცილი თანხებიდან დაახლოებით სამი მილიარდი დოლარი USAID-ისთვის, ხოლო 900 მილიონი სახელმწიფო დეპარტამენტისთვის გამოყოფილ დაფინანსებაა. ასევე გაუქმდება საერთაშორისო სამშვიდობო ოპერაციებისთვის გამოყოფილი დაახლოებით 800 მილიონი და 300 მილიონზე მეტი, რომელიც სხვა ქვეყნებში დემოკრატიული ღირებულებების წასახალისებლად იყო გამიზნული.

„ტრამპის ადმინისტრაცია ვალდებულია, ამერიკის ფისკალური სისტემა მოაწესრიგოს სამთავრობო ხარჯების შემცირებით“, - ნათქვამია თეთრი სახლის განცხადებაში. 

ინფორმაციისთვის, ჯიმი კარტერი იყო პრეზიდენტი, რომელმაც 1977 წელს „ფარული რეზესია“ გამოიყენა.