აშშ-ის პრეზიდენტი დონალდ ტრამპი მექსიკისა და კანადის ლიდერებთან სავაჭრო საკითხების განხილვას გეგმავს. ამის შესახებ Reuters-ი წერს. 

ტრამპმა განაცხადა, რომ ვაშინგტონში 2026 წლის მსოფლიო ჩემპიონატის წილისყრის შემდეგ მექსიკისა და კანადის ლიდერებთან პირისპირ შეხვედრაზე სავაჭრო საკითხებს განიხილავს.

„ჩვენ ორივეს შევხვდებით და ძალიან კარგად გავუგებთ ერთმანეთს“, - აღნიშნა ტრამპმა კენედის ცენტრში წილისყრაზე მისვლისას.

წითელ ხალიჩაზე მისვლისას რეპორტიორის კითხვას, განიხილავენ თუ არა ისინი იმიგრაციასა და ვაჭრობას, ტრამპმა დადებითად უპასუხა. 

აშშ-ის პრეზიდენტი ესაუბრა კანადის პრემიერ-მინისტრ მარკ კარნის და მექსიკის პრეზიდენტ კლაუდია შეინბაუმს, როდესაც ისინი ღონისძიებას კენედის ცენტრის ხელოვნების ცენტრში მდებარე ლოჟიდან ადევნებდნენ თვალს. ღონისძიების გახსნის მიზნით, სამივე მათგანი სცენაზე გავიდა.

თეთრ სახლს შეხვედრის დეტალები არ გაუსაჯაროებია და არც ის დაუკონკრეტებია, შეხვდება თუ არა პრეზიდენტი ორ ლიდერს ცალ-ცალკე. შეხვედრა იმ დროს იმართება, როდესაც შეერთებული შტატები, მექსიკა და კანადა აშშ-მექსიკა-კანადის სავაჭრო შეთანხმების 2026 წლის ოფიციალური განხილვისთვის ემზადებიან, აშშ-ის მიერ ტარიფების ზრდისა და ვაშინგტონის მოწოდებების ფონზე ხელახლა მოლაპარაკების, ან შეთანხმებიდან შესაძლო გასვლის შესახებ.

მექსიკის პრეზიდენტმა კლაუდია შეინბაუმმა წინა დღეს განაცხადა, რომ შეერთებულ შტატებში ვიზიტის დროს ტრამპსა და კარნისთან ხანმოკლე შეხვედრას გამართავს. ეს მისი პირველი პირისპირ შეხვედრა იქნება ტრამპთან მას შემდეგ, რაც გასული წლის ოქტომბერში თანამდებობა დაიკავა.

ტრამპი მექსიკას მოუწოდებს, მეტი გააკეთოს ნარკოკარტელებისა და აშშ-ში ფენტანილის მსგავსი ნარკოტიკების შედინების წინააღმდეგ საბრძოლველად. მან პირობა დადო, რომ ნარკოტიკებთან ბრძოლაში მეტი პროგრესის მიღწევამდე შეინარჩუნებს 25%-იან ტარიფს მექსიკურ საქონელზე, რომელიც არ შეესაბამება აშშ-მექსიკა-კანადის შეთანხმებას.

რაც შეეხება კანადას, ტრამპმა კარნისთან ოქტომბერში მეგობრული შეხვედრა გამართა, თუმცა შემდეგ ქვეყანასთან ყველა სავაჭრო მოლაპარაკება შეაჩერა. მიზეზი გახდა ონტარიოს პროვინციის მიერ ეთერში გაშვებული რეკლამა, სადაც წარმოდგენილი იყო ფრაგმენტი, როგორ აკრიტიკებს აშშ-ის ყოფილი პრეზიდენტი რონალდ რეიგანი ტარიფებს. ტრამპი დაიმუქრა, რომ კანადურ იმპორტზე გადასახადებს 10%-ით გაზრდიდა, თუმცა ეს პირობა ჯერ არ შეუსრულებია.