აშშ-ის პრეზიდენტმა დონალდ ტრამპმა განაცხადა, რომ მას არ აწუხებს აშშ-ის ბენზინის ფასების ზრდა, რაც განპირობებულია ირანთან კონფლიქტის გაფართოებით და აღნიშნა, რომ აშშ-ის სამხედრო ოპერაცია მისი პრიორიტეტია. ამის შესახებ ტრამპმა Reuters-ისთვის ექსკლუზიურ ინტერვიუში ისაუბრა.

„ამის შესახებ არანაირი შეშფოთება არ მაქვს“, - განაცხადა მან, როდესაც ბენზინგასამართ სადგურებზე ფასების ზრდაზე ჰკითხეს.

„როდესაც ეს ყველაფერი დასრულდება, ისინი ძალიან სწრაფად დაეცემა და თუ გაიზრდება, გაიზრდება, მაგრამ ეს გაცილებით მნიშვნელოვანია, ვიდრე ბენზინის ფასების ოდნავ გაზრდა“, - დასძინა აშშ-ის პრეზიდენტმა.

ინტერვიუში მან ასევე განაცხადა, რომ არ აპირებს სტრატეგიული ნავთობის რეზერვის, მსოფლიოში უდიდესი საგანგებო ნედლი ნავთობის მარაგის, გამოყენებას და რომ დარწმუნებულია, ჰორმუზის სრუტე [ირანის სიახლოვეს ნავთობის გადაზიდვის კრიტიკული არხი] ღია დარჩება, რადგან ირანის ფლოტი „ზღვის ფსკერზეა“.

28 თებერვალს ირანის წინააღმდეგ აშშ-ისრაელის ომის დაწყების შემდეგ გლობალური ნავთობის ფასები 16%-ით გაიზარდა, რადგან კონფლიქტის გავრცელებამ ახლო აღმოსავლეთში მომარაგების შეფერხება გამოიწვია. ტრამპმა განაცხადა, რომ ხარჯები „ძალიან არ გაზრდილა“.

პოლიტიკური ანალიტიკოსების თქმით, ბენზინის ფასების მუდმივმა ზრდამ შესაძლოა, რესპუბლიკელებს ნოემბრის შუალედურ არჩევნებში ზიანი მიაყენოს, როდესაც აშშ-ის კონგრესზე კონტროლი სასწორზე დადგება. ამომრჩევლები ისედაც უკმაყოფილონი არიან ტრამპის ეკონომიკური პოლიტიკით.

თეთრი სახლის პრესმდივანმა კეროლაინ ლევიტმა განაცხადა, რომ მიუხედავად ტრამპის საჯარო მცდელობისა, შეემცირებინა ფასების ზრდის მნიშვნელობა, თეთრი სახლის ადმინისტრაციის უფროსმა სუზი უაილსმა და ენერგეტიკის მდივანმა კრის რაიტმა ნავთობკომპანიების აღმასრულებელ დირექტორებთან მოლაპარაკებები გამართეს, რათა ენერგომატარებლების ფასების ზრდასთან ბრძოლის შესაძლო ვარიანტები განეხილათ.

თეთრი სახლის კიდევ ერთმა ოფიციალურმა პირმა სააგენტოს ანონიმურობის პირობით განუცხადა, რომ თეთრი სახლის ენერგეტიკისა და ეროვნული უსაფრთხოების ჯგუფებს შორის მიმდინარეობს ბრძოლა გაზის ფასების შემცირებისკენ მიმართული ზომების შესამუშავებლად.

ოფიციალური პირის თქმით, უაილსმა თეთრ სახლში შეხვედრებზე განაცხადა, რომ ფასების ზრდასთან დაკავშირებით უმოქმედობა არჩევნებში რესპუბლიკელებისთვის „კატასტროფული“ იქნება.