თეთრი სახლის ოფიციალურმა პირებმა აღიარეს, რომ აშშ-ის პრეზიდენტი დონალდ ტრამპი აღდგომისთვის (20 აპრილი) უკრაინაში ცეცხლის შეწყვეტას ვერ შეძლებს. ტრამპის ადმინისტრაცია სულ უფრო მეტად იმედგაცრუებულია კრემლის გაჭიანურების ტაქტიკით და შეთანხმების მიღწევის მიზნით, მოსკოვსა და კიევზე ზეწოლისთვის ემზადება, - იუწყება The Telegraph.

როგორც გამოცემა წერს, პრეზიდენტობის დასაწყისში ტრამპმა მიზნად დაისახა ცეცხლის სრულად შეწყვეტის მიღწევა აპრილში, ან მაისში და შემდეგ გრძელვადიანი მშვიდობის დამყარება. თუმცა, ასეთი შეთანხმება უახლოეს თვეებში არ იქნება მიღწეული, განაცხადეს მაღალჩინოსნებმა. ეს ომის გაგრძელების ალბათობას ზრდის.

სამშვიდობო მოლაპარაკებების წარუმატებლობა - ტრამპის იმიჯზე დარტყმა

ომის დასრულების წარუმატებლობა დიდი დარტყმა იქნება ტრამპისთვის, რომელიც საკუთარ თავს ხშირად უწოდებდა „მშვიდობისმყოფელსა და გამაერთიანებელს“ და პირობას დებდა, რომ კონფლიქტს 24 საათში დაასრულებდა. 

ამავდროულად, გამოცემა წერს, რომ ამერიკელი ოფიციალური პირები რამდენიმე კვირაა, პირად საუბრებში უკრაინის მხრიდან მოლაპარაკებების წარმოებაზე „უკმაყოფილებას გამოხატავენ“. უფრო მეტიც, მათ მიაჩნიათ, რომ უკრაინა წიაღისეულის შესახებ შეთანხმების დადებას ეწინააღმდეგება და სამშვიდობო მოლაპარაკებებს აჭიანურებს.

ტრამპმა, თავის მხრივ, ვერ შეიკავა ემოციები და მოულოდნელად გააკრიტიკა კრემლის ლიდერი ვლადიმერ პუტინი. აშშ-ის პრეზიდენტმა განაცხადა, რომ რუს კოლეგაზე „ძალიან გაბრაზებულია“ იმის გამო, რომ ის ცეცხლის შეწყვეტის შესახებ მოლაპარაკებებს აჭიანურებს. 

თეთრი სახლი რუსეთის წინააღმდეგ ახალ სანქციებს განიხილავს

ჟურნალისტები აღნიშნავენ, რომ ცოტა ხნის წინ თეთრ სახლში და აშშ-ის სახელმწიფო დეპარტამენტში შეხვედრების სერია გაიმართა. აშშ-ის ოფიციალურმა პირებმა აღიარეს, რომ პუტინი აქტიურად ეწინააღმდეგება ვაშინგტონის ძალისხმევას გრძელვადიანი სამშვიდობო შეთანხმების მისაღწევად.

დისკუსიების დროს ასევე განიხილებოდა რუსეთის წინააღმდეგ შესაძლო ეკონომიკური და დიპლომატიური სასჯელის ზომები.