The Telegraph: მაკრონი შესაძლოა, გახდეს მთავარი ევროპელი ლიდერი, რომელიც პუტინთან უკრაინის შესახებ მოლაპარაკებებს გამართავს
საფრანგეთის პრეზიდენტი ემანუელ მაკრონი შესაძლოა, გახდეს მთავარი ევროპელი ლიდერი, რომელიც რუსეთის მმართველ ვლადიმერ პუტინთან უკრაინაში მშვიდობის დამყარების შესახებ მოლაპარაკებებს აწარმოებს. ამის შესახებ The Telegraph წერს.
„მსურველთა კოალიციის“ ზოგიერთი ქვეყანა დაჟინებით მოითხოვს, რომ მაკრონმა წარმართოს რუსეთთან ურთიერთობის პროცესი, როგორც კიევის მხარდაჭერის მცდელობის ნაწილი.
მაკრონი და დიდი ბრიტანეთის პრემიერ-მინისტრი კირ სტარმერი, რომელიც უკრაინაში ცეცხლის შეწყვეტის შეთანხმების მიღწევის მიზნით, „მსურველთა კოალიციას“ ხელმძღვანელობს, მოსკოვთან ყველაზე სავარაუდო მომლაპარაკებლებად დასახელდნენ.
გამოცემა აღნიშნავს, რომ სტარმერი არ გეგმავს პუტინთან მოლაპარაკებას, უკრაინის თავდაცვის მხარდასაჭერად დიდი ბრიტანეთის ძალისხმევის ფარგლებში. ამავდროულად, ელისეის სასახლის წყარომ განაცხადა, რომ მაკრონს შეუძლია ამ როლის შესრულება, „როცა დრო მოვა“.
