ოთხი ამოუცნობი დრონი აკვირდებოდა უკრაინის პრეზიდენტ ვოლოდიმირ ზელენსკის თვითმფრინავის ფრენის ტრაექტორიას მისი ირლანდიაში ვიზიტის დროს. ამის შესახებ The Journal-ი იუწყება. 

გამოცემის ცნობით, თვითმფრინავი დუბლინის აეროპორტში დაგეგმილზე ოდნავ ადრე დაეშვა, თუმცა დრონებმა „ზუსტად დროულად“ მიაღწიეს იმ ადგილს, სადაც ზელენსკის გადაფრენა იყო მოსალოდნელი.

ამის შემდეგ დრონები დაფრინავდნენ ირლანდიის საზღვაო ძალების გემის თავზე, რომელიც უკრაინის ლიდერის ვიზიტის დროს ირლანდიის ზღვაში საიდუმლოდ იყო გაშვებული. ირლანდიამ გადაწყვიტა, არ ჩამოეგდო დრონები, რადგან გემს მათი განეიტრალების საშუალებები არ ჰქონდა.

ანონიმურმა წყაროებმა The Journal-ს განუცხადეს, რომ დრონები დუბლინის ჩრდილო-აღმოსავლეთიდან აფრინდნენ და ჰაერში ორ საათამდე დარჩნენ. ირლანდიის პოლიცია ინციდენტს იძიებს. ამჟამად უცნობია, ვინ გაუშვა და მართავდა დრონებს.

ირლანდიელი სამართალდამცავი ორგანოების წარმომადგენლები მიიჩნევენ, რომ მიზანი ზელენსკის თვითმფრინავის ირლანდიაში ჩასვლის ჩაშლა იყო, რადგან დრონებს შუქები ჩართული ჰქონდათ.

ირლანდიის პოლიციის კომისარს ინციდენტის შესახებ სამშაბათს, 2 დეკემბერს, დილით აცნობეს. ინციდენტის შესახებ ასევე აცნობეს ირლანდიის პრემიერ-მინისტრ მაიკლ მარტინს და იუსტიციისა და თავდაცვის მინისტრებს. უცნობია, გადაეცა თუ არა დრონების შესახებ ინფორმაცია პრეზიდენტ ზელენსკის გუნდს.

როგორც ჟურნალისტები აცხადებენ, ირლანდიის უსაფრთხოების სამსახურებმა დაადგინეს, რომ დუბლინის აეროპორტში დაფიქსირებული დრონები დიდი, ძალიან ძვირადღირებული, სამხედრო დანიშნულების დრონები იყო და ინციდენტი შეიძლება კლასიფიცირდეს, როგორც ჰიბრიდული თავდასხმა.