პოლიტიკის საკითხებში თეთრი სახლის ადმინისტრაციის უფროსის მოადგილემ სტივენ მილერმა განაცხადა, რომ დანიის მიერ გრენლანდიის ფლობა „უსამართლოა“, რადგან კოპენჰაგენი კუნძულის დაცვას ვერ უზრუნველყოფს. ამის შესახებ მან Fox News-თან ინტერვიუში განაცხადა.

მილერმა აღნიშნა, რომ დანიამ გრენლანდიის დაცვა ვერ შეძლო და შესაბამისად, არ აქვს მისი ფლობის უფლება.

„მათ არ შეუძლიათ გრენლანდიის ტერიტორიის კონტროლი. 500 წლის განმავლობაში არსებული ყველა სამართლებრივი ნორმის თანახმად, ტერიტორიის გასაკონტროლებლად აუცილებელია მისი დაცვა, გაუმჯობესება და დასახლება, დანიამ კი ყველა ეს მოთხოვნა ვერ შეასრულა“, - განაცხადა ოფიციალურმა პირმა.

მილერის თქმით, ვაშინგტონი „უსამართლოდ“ მიიჩნევს იმას, რომ აშშ გრენლანდიის დაცვისთვის „იხდის“ მაშინ, როდესაც ის დანიის კონტროლის ქვეშაა.

„ეს უსამართლო შეთანხმებაა. ეს არაკეთილსინდისიერი შეთანხმებაა. და რაც მთავარია, ის უსამართლოა ამერიკელი გადასახადის გადამხდელების მიმართ, რომლებიც თაობების განმავლობაში აფინანსებდნენ ევროპის მთელ თავდაცვას“, - განაცხადა მილერმა.

ოფიციალურმა პირმა კიდევ ერთხელ გაიმეორა, რომ გრენლანდია აშშ-ის ეროვნული ინტერესებისთვის კრიტიკულად მნიშვნელოვანია.