თეთრი სახლის პრესმდივნის მოადგილემ ანა კელიმ უარყო მედიაში გავრცელებული ინფორმაცია, რომ შეერთებული შტატები მზადაა, უკრაინას უსაფრთხოების გარანტიები მხოლოდ დონბასიდან ჯარების გაყვანაზე თანხმობის სანაცვლოდ მისცეს. ამის შესახებ მან Financial Times-თან კომენტარში განაცხადა. 

ოფიციალური პირის თქმით, ცნობები „ტყუილია“ და მიმართულია სამშვიდობო პროცესში მიღწეული პროგრესის დასაზიანებლად. 

„ეს სრულიად არასწორია - შეერთებული შტატების ერთადერთი როლი სამშვიდობო პროცესში არის შეთანხმების მისაღწევად ორივე მხარის გაერთიანება. სამწუხაროა, რომ Financial Times-ი საშუალებას აძლევს თავდამსხმელებს, ანონიმურად მოიტყუონ სამშვიდობო პროცესის ჩაშლის მიზნით, რომელიც ახლა შესანიშნავ მდგომარეობაშია ამ შაბათ-კვირას აბუ-დაბიში ისტორიული სამმხრივი შეხვედრის შემდეგ“, - აღნიშნა კელიმ.

აშშ-ს პოზიციის შესახებ ინფორმირებულმა წყარომ Financial Times-ს განუცხადა, რომ ვაშინგტონი „არ ცდილობს, უკრაინას რაიმე ტერიტორიული დათმობა აიძულოს“. ამასთან, შეერთებული შტატების უსაფრთხოების გარანტიები დამოკიდებულია ორივე მხარის მზადყოფნაზე სამშვიდობო შეთანხმების დასადებად, მისი შინაარსი კი მხოლოდ რუსეთსა და უკრაინაზეა დამოკიდებული.