უნგრეთის საგარეო საქმეთა მინისტრმა პიტერ სიიარტომ განაცხადა, რომ ბუდაპეშტმა უკვე დაიწყო მუშაობა ევროკავშირის სასამართლოში რუსული ნავთობისა და გაზის იმპორტის აკრძალვის შესახებ გადაწყვეტილების გასაჩივრებაზე, როგორც კი ეს საბოლოოდ შეთანხმდება. ამის შესახებ მან ბრიუსელში გამართულ ბრიფინგზე განაცხადა.

კერძოდ, ევროკავშირში რუსულ გაზზე სრულად უარის თქმის წინასწარი შეთანხმების თაობაზე საუბრისას სიიარტომ განაცხადა, რომ ბრიუსელი „უნგრეთის ენერგეტიკული უსაფრთხოების გაუქმების გადაწყვეტილების მიღების საბოლოო ფაზაშია“.

მან აღნიშნა, რომ უნგრეთი დაცული უნდა იყოს ამ „პოლიტიკურად მოტივირებული გადაწყვეტილებისგან“ და შესაბამისად, „როგორც კი ამ დიქტატს საბოლოო სახით ბრიუსელში კენჭს უყრიან, ჩვენ დაუყოვნებლივ გავასაჩივრებთ მას ევროკავშირის სასამართლოში“.

„ჩვენ დავიწყეთ საჭირო სამართლებრივი სამუშაოები ამ დიქტატის ევროკავშირის სასამართლოში გასასაჩივრებლად, რომელიც უკვე მიმდინარეობს“, - განაცხადა სიიარტომ.

უნგრელმა მინისტრმა განაცხადა, რომ გადაწყვეტილება სრულიად ეწინააღმდეგება ევროკავშირის შესახებ ხელშეკრულებას, რომელიც ადგენს, რომ ენერგეტიკული პოლიტიკა წევრი სახელმწიფოების ეროვნული პასუხისმგებლობაა.

მან ასევე აღნიშნა, რომ ეს ფაქტობრივად სანქციების ზომაა, „შენიღბული სავაჭრო პოლიტიკის სახით“, რადგან ამით ბრიუსელი გვერდს უვლის სანქციების მიღებისთვის აუცილებელ ერთსულოვნების მოთხოვნას.

მან დასძინა, რომ უნგრეთი ამ სამართლებრივ პროცედურაში სლოვაკეთთან ერთად იმოქმედებს.