სიდნეიში, ხანუქას დღესასწაულზე მომხდარი სასიკვდილო ტერორისტული თავდასხმიდან რამდენიმე საათის შემდეგ ისრაელის პრემიერ-მინისტრმა ბენიამინ ნეთანიაჰუმ განაცხადა, რომ აგვისტოში მან წერილი გაუგზავნა ავსტრალიის პრემიერ-მინისტრ ენტონი ალბანეზეს, რომელშიც კანბერა „ანტისემიტურ ცეცხლზე“ ნავთის დასხმაში დაადანაშაულა.

წერილის პერიფრაზირებით ნეთანიაჰუმ განაცხადა, რომ ალბანეზეს პოლიტიკა, რომელიც პალესტინის სახელმწიფოს აღიარებასაც მოიცავს, ხელს უწყობს „ებრაელთა მიმართ სიძულვილს, რომელიც ახლა თქვენს ქუჩებში დაძრწის. ანტისემიტიზმი კიბოა. ის ვრცელდება, როდესაც ლიდერები დუმან. თქვენ სისუსტე მოქმედებით უნდა ჩაანაცვლოთ“.

ნეთანიაჰუმ თავდასხმას „საშინელება, ცივსისხლიან მკვლელობა“ უწოდა. „სამწუხაროდ, მსხვერპლთა რიცხვი ყოველ წუთს იზრდება. ჩვენ ვიხილეთ ბოროტების სიღრმე. ჩვენ ასევე ვიხილეთ ებრაული გმირობის მწვერვალი“, - განაცხადა მან, რითაც მიანიშნა გამვლელზე, რომელიც, მისი თქმით, ებრაელი იყო და რომელმაც თავდასხმის დროს ერთ-ერთ შეიარაღებულ პირს იარაღი წაართვა.

„ჩვენ გლობალური ანტისემიტიზმის წინააღმდეგ ბრძოლაში ვართ და მასთან ბრძოლის ერთადერთი გზა მისი დაგმობა და მასთან ბრძოლაა. სხვა გზა არ არსებობს. სწორედ ამას ვაკეთებთ ჩვენ ისრაელში. ისრაელის თავდაცვის ძალები და ჩვენი უსაფრთხოების ძალები, ჩვენი მთავრობა და ჩვენი ერი, ჩვენ ამას გავაგრძელებთ“, - აღნიშნავს ნეთანიაჰუ.