ავსტრალიის ქალაქ სიდნეიში, ბონდის სანაპიროზე ებრაული დღესასწაულის, ხანუქას აღნიშვნის დროს სროლა მოხდა. სულ მცირე ათი ადამიანი დაიღუპა, ხოლო ცამეტი საავადმყოფოში გადაიყვანეს. ამის შესახებ ინფორმაციას Sky News-ი და Times of Israel-ი ავრცელებენ.

ამჟამად პოლიცია მასშტაბურ ოპერაციას ატარებს, ტერიტორია ნაწილობრივ არის გადაკეტილი. სიდნეის ებრაული თემის დაახლოებით 2000-მა წევრმა მონაწილეობა მიიღო სანაპირო ზოლში გამართულ მასობრივ ღონისძიებაში, სადაც ადგილობრივი ოპოზიციის ლიდერის, კელი სლოუნის გამოსვლა იყო დაგეგმილი. თვითმხილველების თქმით, ებრაული თემის ერთ-ერთი ლიდერის გამოსვლის დროს ხალხმა მოულოდნელად გაქცევა დაიწყო, როდესაც სროლის ხმა გაისმა.

ადგილობრივი მედიის ცნობით, პოლიციამ ერთ-ერთი სავარაუდო მსროლელი დაჭრა. ინციდენტში მონაწილე კიდევ ორი ​​პირი დაკავებულია. სამართალდამცავი ორგანოების წარმომადგენლები აღნიშნავენ, რომ ოპერაცია გრძელდება. ბონდის მცხოვრებლები იუწყებიან, რომ დაახლოებით 50 გასროლის ხმა გაიგეს.

ავსტრალიის პრემიერ-მინისტრის ენტონი ალბანეზის პრესსპიკერის თქმით, ხელისუფლება ინფორმირებულია ინციდენტის შესახებ.

„ჩვენ მოვუწოდებთ ბონდის რაიონში მცხოვრებ მოსახლეობას, დაიცვან პოლიციის მითითებები“, - განაცხადა მან.

თავის მხრივ, ახალი სამხრეთ უელსის შტატის პოლიციამ შემთხვევის ადგილზე მყოფ ხალხს მოუწოდა, დაუყოვნებლივ იპოვონ თავშესაფარი და ოპერაციის ზონას არ მიუახლოვდნენ.