უკრაინის ქალაქებზე შობის ღამეს განხორციელებული მორიგი მასშტაბური იერიშების შემდეგ უკრაინის საგარეო საქმეთა მინისტრმა ანდრეი სიბიგამ საერთაშორისო საზოგადოებას მოუწოდა, რუსეთზე ზეწოლა გააძლიეროს. ამის შესახებ უკრაინელმა მინისტრმა X-ზე დაწერა.

როგორც სიბიგამ აღნიშნა, შობის წინა დღეს ოდესაში რუსეთის მიერ განხორციელებული დარტყმების შედეგად ერთი ადამიანი დაიღუპა და ორი დაშავდა. ხარკოვის ოლქში ერთი მშვიდობიანი მოქალაქე დაიღუპა, ხოლო მეორე - ჩერნიგოვის ოლქში. ზაპოროჟიესა და სუმის ოლქებში ადამიანები დაშავდნენ.

„ოდესა ამ დღეებში ყველაზე მეტად იტანჯება. რუსეთი განზრახ ანადგურებს ენერგეტიკულ და სამოქალაქო ინფრასტრუქტურას, რის გამოც ხალხი ელექტროენერგიის, წყლისა და გათბობის გარეშე ყინვაში რჩება. ამას არანაირი სამხედრო მიზანი არ აქვს - ეს უბრალოდ რუსეთის განზრახვაა, მოკლას ადამიანები იმის გამო, რომ ისინი უკრაინელები არიან“, - ხაზგასმით აღნიშნა მან.

საგარეო საქმეთა მინისტრის თქმით, ასეთი ქმედებები 1948 წლის გენოციდის შესახებ კონვენციის II მუხლის (c) ქვეპუნქტის ფარგლებში ხვდება: „ჯგუფისთვის განზრახ ცხოვრების ისეთი პირობების შექმნა, რომლებიც მიზნად ისახავს მისი ფიზიკური განადგურების სრულად, ან ნაწილობრივ გამოწვევას“.

„მოვუწოდებთ მსოფლიოს, იმოქმედოს, გაზარდოს ზეწოლა აგრესორზე და გააძლიეროს უკრაინის შესაძლებლობები საკუთარი თავისა და მისი ხალხის დასაცავად, მათ შორის საჰაერო თავდაცვის“, - დაასკვნა მან.

Russia did not stop its brutal bombing of civilians in Ukraine even on the holy Christmas night.

Strikes on Odesa killed one person and injured two others. One civilian was killed in the Kharkiv region and another in the Chernihiv region. People were injured in the Zaporizhzhia… pic.twitter.com/IYXot40QT9

— Andrii Sybiha 🇺🇦 (@andrii_sybiha) December 25, 2025