5 დეკემბერს ბუდაპეშტის მემორანდუმის ხელმოწერიდან 31 წელი შესრულდა, რომელიც „ჩავარდნილი უსაფრთხოების შეთანხმების“ სინონიმი გახდა. დღეს უკრაინა აღარ ენდობა ცარიელ დაპირებებს. ამის შესახებ უკრაინის საგარეო საქმეთა მინისტრი ანდრეი სიბიგა სოციალურ ქსელში წერს.

„31 წლის წინ, ამ დღეს, ხელი მოეწერა ბუდაპეშტის მემორანდუმს. ქაღალდის ნაგლეჯს, რომელიც უსაფრთხოების წარუმატებელი შეთანხმების სინონიმად იქცა. წარსულში ასეთი მწარე გამოცდილების შემდეგ უკრაინა აღარ ენდობა ცარიელ დაპირებებს - ჩვენ ვენდობით ჩვენი არმიისა და იარაღის ძალას“, - ნათქვამია მის წერილში.

სიბიგამ აღნიშნა, რომ დღეს უკრაინას „რეალური, სამართლიანი და მდგრადი მშვიდობისთვის“ უსაფრთხოების მყარი გარანტიები სჭირდება.

„როდესაც ჩვენ ვმუშაობთ უკრაინის წინააღმდეგ რუსეთის ომის დასასრულებლად, მნიშვნელოვანია, გვახსოვდეს ბუდაპეშტის მწარე გაკვეთილები“, - ხაზგასმით აღნიშნა მინისტრმა.

ინფორმაციისთვის, ბუდაპეშტის მემორანდუმი უსაფრთხოების გარანტიების შესახებ 1994 წლის 5 დეკემბერს გაფორმდა. მემორანდუმის თანახმად, რუსეთის ფედერაციამ, დიდმა ბრიტანეთმა და შეერთებულმა შტატებმა ვალდებულება აიღეს, პატივისცემით მოპყრობოდნენ უკრაინის დამოუკიდებლობას, სუვერენიტეტსა და არსებულ საზღვრებს.

31 years ago on this day, the Budapest memorandum was signed. A piece of paper that has become synonymous with a failed security arrangement.

Having had such a bitter experience in the past, Ukraine does not trust empty pledges anymore—we trust the strength of our army and…

— Andrii Sybiha 🇺🇦 (@andrii_sybiha) December 5, 2025