ჩინეთმა გააფრთხილა შეერთებული შტატები, რომ ამერიკული იარაღის ტაივანისთვის მიყიდვამ, შესაძლოა, საფრთხე შეუქმნას აშშ-ის პრეზიდენტ დონალდ ტრამპის აპრილში პეკინში დაგეგმილ ვიზიტს, - ამის შესახებ ინფორმაციას RBC-Ukraine Financial Times-ზე დაყრდნობით ავრცელებს.

გამოცემის ცნობით, პეკინმა „სერიოზული შეშფოთება“ გამოთქვა ტაივანისთვის „პატრიოტის“ ტიპის საზენიტო-სარაკეტო სისტემებისა და სხვა შეიარაღების შესაძლო მიწოდებასთან დაკავშირებით.

ჩინურმა მხარემ აღნიშნა, რომ ასეთმა ნაბიჯებმა შეიძლება უარყოფითად იმოქმედოს ორმხრივ ურთიერთობებზე და გაართულოს ორი ქვეყნის ლიდერების მომავალი შეხვედრისთვის მზადება.

ცნობილია, რომ ჩინეთის ლიდერმა სი ძინპინმა ტაივანისთვის იარაღის მიყიდვის საკითხი თეთრი სახლის პრეზიდენტ დონალდ ტრამპთან სატელეფონო საუბრის დროს წამოჭრა. 

რამდენიმე წყაროს თქმით, აშშ-ის მიერ ტაივანის მხარდაჭერის პაკეტმა, შესაძლოა, 20 მილიარდ დოლარს მიაღწიოს.

ამავდროულად, ორი წყაროს ცნობით, ზოგიერთი ამერიკელი ჩინოვნიკი ამბობს, რომ ჩინეთი ბლეფობს და ვიზიტს არ გააუქმებს.

Patriot-ის საჰაერო თავდაცვის სისტემების გარდა, აშშ ტაივანს საშუალებას მისცემს შეიძინოს მეტი NASAMS საჰაერო თავდაცვის სისტემა და კიდევ ორი ​​შეიარაღების სისტემა.

ტრამპის პეკინში ვიზიტი გამოცხადდა, როგორც ურთიერთობების სტაბილიზაციის მცდელობა მრავალწლიანი დაძაბულობის შემდეგ, განსაკუთრებით ჩინეთთან ვაჭრობისა და გლობალური კონკურენციის საკითხებში.

„FT“-ის ცნობით, ტაივანთან დაკავშირებით ამერიკული პოზიციების საპასუხოდ, ჩინელმა ოფიციალურმა პირებმა დაადასტურეს მზადყოფნა, გადადგან სარკისებური ნაბიჯები, თუ რეგიონში სტრატეგიული ბალანსი დარღვეულად ჩაითვლება.