23 აპრილს ვაშინგტონში ვიზიტის დროს უკრაინის პრემიერ-მინისტრი დენის შმიგალი აშშ-ის ხაზინის მდივან სკოტ ბესენტს შეხვდა და ე.წ. „წიაღისეულის შესახებ“ შეთანხმების გაფორმებაში პროგრესი განიხილა. ამის შესახებ შმიგალმა Telegram-ზე განაცხადა. 

მან ხაზგასმით აღნიშნა, რომ უკრაინა მხარს უჭერს „ამერიკელ და უკრაინელ ხალხებს შორის ეკონომიკური პარტნიორობის შესახებ შეთანხმების დადებას და ინვესტიციების აღდგენის ფონდის შექმნას“.

„ჩვენი მოლაპარაკებათა გუნდები აგრძელებენ აქტიურ მუშაობას, როგორც ეს ხელმოწერილი მემორანდუმით არის გათვალისწინებული. მოლაპარაკებათა ჯგუფები მიმდინარე წლის 26 აპრილამდე წარადგენენ ანგარიშს პროგრესის შესახებ“, - დასძინა მან.

შმიგალმა და ბესენტმა ასევე განიხილეს „მომავალი დოკუმენტის მნიშვნელოვანი პოლიტიკური ასპექტები“. პრემიერ-მინისტრმა ხაზგასმით აღნიშნა, რომ მომავალი შეთანხმება უნდა იყოს რატიფიცირებული უმაღლეს რადაში.

ამასთან, შმიგალის თქმით, უკრაინა და შეერთებული შტატები შეთანხმდნენ, რომ დაიწყონ მუშაობა თავისუფალი ვაჭრობის ზონაზე.