საფრანგეთი ჰორმუზის სრუტეში ნაღმსაწინააღმდეგო ძალებს ტოვებს - ავიამზიდი „შარლ დე გოლი“ ტულონში ბრუნდება
ფრანგული ავიამზიდი „შარლ დე გოლი“, რომელიც ახლო აღმოსავლეთში მაისიდან არის განლაგებული, რეგიონს ტოვებს და ხმელთაშუა ზღვის პორტ ტულონში ბრუნდება, - ამის შესახებ საფრანგეთის პრეზიდენტმა ემანუელ მაკრონმა განაცხადა.
„საფრანგეთმა ახლო აღმოსავლეთში ორი ნაღმსაწინააღმდეგო ხომალდი განალაგა. ორ ფრეგატასა და საზღვაო საპატრულო თვითმფრინავთან ერთად, ეს ძალები მზად არიან, პარტნიორებთან თანამშრომლობით, ხელი შეუწყონ ნაოსნობის სრულ აღდგენას და უზრუნველყონ ხომალდების უსაფრთხო გადაადგილება ჰორმუზის სრუტეში“, - აღნიშნავს საფრანგეთის პრეზიდენტი.
როგორც მაკრონი წერს, 17 ივნისს აშშ-სა და ირანის შორის ხელმოწერილი ურთიერთგაგების მემორანდუმი მნიშვნელოვანი წინ გადადგმული ნაბიჯია რეგიონული სტაბილურობის მიმართულებით. დოკუმენტი, მათ შორის, კიდევ ერთხელ ადასტურებს ჰორმუზის სრუტეში ნაოსნობის თავისუფლების პრინციპს.
„ამ დადებითი მოვლენებისა და უსაფრთხოების საჭიროებების ცვლილების გათვალისწინებით, ასევე, ომანის სულთანთან გამართული მოლაპარაკებების შემდეგ, გადავწყვიტე ჩვენი სამხედრო განლაგება შემეცვალა.
შესაბამისად, ავიამზიდი „შარლ დე გოლი“ საკუთარ ბაზაზე, ტულონიში ბრუნდება, ხოლო ჩვენი ნაღმსაწინააღმდეგო საშუალებები და მათი ესკორტი რეგიონში რჩებიან და პარტნიორებთან ერთად მოქმედებისთვის სრულ მზადყოფნაში არიან“, - განაცხადა საფრანგეთის პრეზიდენტმა.
მაკრონმა დასძინა, რომ საფრანგეთი „სრულად ინარჩუნებს ჩართულობას და რეგიონში არსებული ვითარებისა და უსაფრთხოების საჭიროებების შესაბამისად, საჭიროებისამებრ, კვლავაც მოახდენს საკუთარი ძალებისა და საშუალებების განლაგებას“.
La France a déployé au Moyen-Orient des moyens de déminage, avec notamment deux chasseurs de mines. Accompagnés de deux frégates et d’un avion de patrouille maritime, ces moyens sont prêts à contribuer, avec nos partenaires, à la pleine reprise de la navigation et à garantir la… pic.twitter.com/4RyZCwx3h6
— Emmanuel Macron (@EmmanuelMacron) July 3, 2026
