ნატოს მოკავშირეებმა 2025 წლის პირველი სამი თვის განმავლობაში უკრაინის სამხედრო დახმარებისთვის 20 მილიარდ ევროზე მეტი გამოჰყვეს. ამის შესახებ ნატოს გენერალურმა მდივანმა მარკ რუტემ განაცხადა, იუწყება Reuters.

გამოცემა იხსენებს, რომ ალიანსის წევრი ქვეყნების საგარეო საქმეთა მინისტრები 3-4 აპრილს ბრიუსელში შეხვდებიან, რათა რუსეთის წინააღმდეგ ომში უკრაინის სამომავლო მხარდაჭერა განიხილონ.

ამავდროულად, Ukrinform-ის ცნობით, რუტემ განაცხადა, რომ მთელმა მსოფლიომ ამ კვირაში უკრაინის ქალაქ ბუჩაში მომხდარი ტრაგედიის სამწუხარო წლისთავი აღნიშნა.

„ამ ქალაქს 2022 წლის ივლისში ვესტუმრე და ვესაუბრე მათ, ვინც გადარჩა. ჩვენ არასდროს დავივიწყებთ ამ უბედურებას. ბუჩას განთავისუფლებიდან სამი წლის განმავლობაში რუსეთი აგრძელებს ომს უკრაინის წინააღმდეგ. მე მივესალმები პრეზიდენტ ტრამპის ძალისხმევას ამ ჩიხიდან გამოსვლისთვის და სრულ მხარდაჭერას ვუცხადებ შეერთებული შტატების ძალისხმევას ამ ომის სამართლიანი და გრძელვადიანი დასრულებისთვის. ასევე მივესალმები დიდი ბრიტანეთის, საფრანგეთისა და სხვა ქვეყნების ძალისხმევას, რომლებიც თავიანთ წვლილს შეიტანენ გრძელვადიანი მშვიდობის უზრუნველყოფაში, როცა ამის დრო მოვა“, - აღნიშნა ნატოს გენერალურმა მდივანმა.

მისი თქმით, რუსეთის ფედერაციის მხრიდან ნატოსთვის საფრთხე კვლავ რჩება. რუტემ გაიხსენა, რომ რუსეთი აგრძელებს თანამშრომლობას ჩინეთთან, ირანთან და ჩრდილოეთ კორეასთან, რაც ზიანს აყენებს არა მხოლოდ უკრაინას, არამედ ზრდის არასტაბილურობას ნატოსა და მთელ მსოფლიოში.

„ჩვენ ვხედავთ ამ და სხვა აქტორებს, რომლებიც ცდილობენ ჩვენი საზოგადოების დესტაბილიზაციას წყალქვეშა ინფრასტრუქტურის დივერსიის, კიბერშეტევების, მკვლელობის მცდელობების გზით. ჩვენ ვცხოვრობთ საშიშ სამყაროში. ამ და სხვა გამოწვევების დასაძლევად ჩვენ უნდა ავაშენოთ უფრო ძლიერი, სამართლიანი და უფრო ლეტალური ნატო. სწორედ ამიტომ, მინისტრები აქ არიან ამ კვირაში, რათა უზრუნველყონ, რომ ალიანსი აქტიურად მუშაობს ამ საერთო მიზნის მისაღწევად“, - განაცხადა რუტემ.