ნატოს გენერალურმა მდივანმა მარკ რუტემ განაცხადა, რომ გრენლანდია დანიას ეკუთვნის და მიიჩნევს, რომ აშშ-თან დაპირისპირების მოგვარების გზა თანამშრომლობაა. ამის შესახებ მან ჟურნალისტებს ბრიუსელში ალიანსის საგარეო საქმეთა მინისტრების შეხვედრის წინ განუცხადა. 

ნატოს გენერალურმა მდივანმა ხაზგასმით აღნიშნა, რომ კუნძულის მფლობელობის საკითხში ეჭვი არ ეპარება. „ის დანიის ნაწილია“, - უპასუხა მან კითხვას და ხაზი გაუსვა, რომ პრობლემის უფრო ფართო კონტექსტი ესმის.

„რა თქმა უნდა, თქვენი შეკითხვა ეხება, როგორ დავიცვათ არქტიკა და შორეული ჩრდილოეთი და ეს არის არა მხოლოდ დანია (რომელსაც განსაკუთრებული როლი აქვს რეგიონში), არამედ ისლანდია, ნორვეგია, ფინეთი, შვედეთი, კანადა, შეერთებული შტატები - ანუ შვიდი მოკავშირე. მერვე ქვეყანა აქ რუსეთია”, - აღნიშნა რუტემ და ხაზი გაუსვა დაპირისპირებას ნატო-რუსეთს შორის და არა - აშშ-დანიას შორის.

გენმდივანმა განაცხადა, რომ ალიანსის როლს ამ სიტუაციაში მნიშვნელოვნად მიიჩნევს: „ნატო სულ უფრო მეტად ერთვება ამაში“.

„ჩვენ, ნატოს წევრი შვიდი ქვეყანა, სულ უფრო და უფრო მჭიდროდ ვმუშაობთ ერთად. ჩვენ ვიცით, რა ხდება იქ, რას აკეთებს ჩინეთი... ვიცით, რომ არ გვაქვს საკმარისი ყინულმჭრელები და ეს არ არის წვრილმანი, ეს ძალიან მნიშვნელოვანია“, - განაცხადა რუტემ.