რუსეთში ჩამოვარდნილი თვითმფრინავის ყველა მგზავრი დაიღუპა - BBC
რუსეთის შორეულ აღმოსავლეთში, ამურის რეგიონში Angara Airlines-ის თვითმფრინავის ჩამოვარდნის შედეგად, ყველა მგზავრი დაიღუპა. ინფორმაციას BBC რუსეთის ოფიციალურ პირებზე დაყრდნობით ავრცელებს.
თვითმფრინავი ხაბაროვსკი-ბლაგივეშენსკი-ტინდას მარშრუტზე რეისს ასრულებდა. ტინდას აეროპორტში დაფრენა თვითმფრინავმა პირველ ჯერზე ვერ შეძლო და მეორე წრეზე წავიდა. ამის შემდეგ კი, მასთან კავშირი დაიკარგა. როგორც ირკვევა, ბორტზე 48 ადამიანი იმყოფებოდა, მათგან 6 ეკიპაჟის წევრი იყო.
მგზავრებს შორის 5 ბავშვი აღმოჩნდა. ამურის რეგიონის გუბერნატორმა ვასილი ორლოვმა სამდღიანი გლოვა გამოაცხადა.
ტერიტორიის შორეული, ჭაობიანი ბუნების გამო, მაშველებს შემთხვევის ადგილზე მისასვლელად, დაახლოებით, 1 საათი დასჭირდათ.
სასწრაფო დახმარების წარმომადგენლების განცხადებით, წინასწარი გამოძიება უკვე დაწყებულია. ავიაკატასტროფის მიზეზად უამინდობის გამო პილოტის შეცდომა ან თვითმფრინავის ტექნიკური გაუმართაობა სახელდება.
