რუსეთმა ხარკოვს დრონებით შეუტია - დაშავდა 12 ადამიანი
რუსეთმა ხარკოვს დრონებით შეუტია. წინასწარი მონაცემებით, დაშავდა 12 ადამიანი. ინფორმაციას უკრაინული მედია ავრცელებს.
„წინასწარი ინფორმაცია გვაქვს ქალაქზე „შაჰედებით“ ორი დარტყმის შესახებ, კერძოდ, ნოვობავარსკის რაიონში. ხარკოვი ბოლო დღეებში კიდევ ერთხელ აღმოჩნდა მტრის დრონების თავდასხმის ქვეშ. ფრთხილად იყავით!“, - წერს Telegram-ზე ხარკოვის მერი იგორ ტერეხოვი.
უკრაინული მედიის ცნობით, ავიაიერიშის შედეგად ორსართულიან შენობას ცეცხლი გაუჩნდა. წინასწარი ინფორმაციით, არიან დაშავებულები, მათ შორის ბავშვები.
ხარკოვის რეგიონული სახელმწიფო ადმინისტრაციის თავმჯდომარის ოლეგ სინეგუბოვის თქმით, მტრის უპილოტო საფრენი აპარატის დარტყმის შედეგად კერძო სახლს და საცხოვრებელ მაღალსართულიან კორპუსს ცეცხლი გაუჩნდა.
მოგვიანებით ტერეხოვმა განაცხადა, რომ იერიშის შედეგად 12 ადამიანი დაშავდა.
