რუსეთის ჯანდაცვის ზედამხედველობის ორგანომ განაცხადა, რომ ჭირის არცერთი შემთხვევა არ გამოვლენილა იმ პირთა შორის, რომლებსაც ციმბირის ჭირის კვლევითი ინსტიტუტის გარდაცვლილ ლაბორანტთან კონტაქტი ჰქონდათ.

ოფიციალური პირების განცხადებით, 28 წლის ქალი 2 ოქტომბერს დაუდგენელი წარმოშობის პნევმონიით დაიღუპა. აღნიშნულმა შემთხვევამ საერთაშორისო შეშფოთება გამოიწვია, მათ შორის აშშ-ის პრეზიდენტ დონალდ ტრამპის მხრიდან.

ზედამხედველობის ორგანომ „როსპოტრებნადზორმა“ განცხადებაში აღნიშნა, რომ ირკუტსკში მდებარე ჭირის იმავე კვლევითი ინსტიტუტის თანამშრომლებს შორის ბოლო 10 დღის განმავლობაში ინფექციური დაავადებების შემთხვევები არ დაფიქსირებულა, ხოლო ჩატარებულმა ფართომასშტაბიანმა კვლევებმა გარდაცვლილი ქალის ორგანიზმში ვერ აღმოაჩინა ისეთი მიკროორგანიზმები, რომლებიც მის საქმიანობასთან იქნებოდა დაკავშირებული.

„საზოგადოებრივი ჯანდაცვის კანონმდებლობის შესაბამისად, დაუყოვნებლივ დაიგეგმა და სრულად განხორციელდა ეპიდემიის საწინააღმდეგო ღონისძიებათა ყოვლისმომცველი კომპლექსი. ეს მოიცავდა პაციენტთან კონტაქტში მყოფი პირების რაც შეიძლება ფართო წრის გამოვლენას და საავადმყოფოში მათი სამედიცინო მეთვალყურეობის ქვეშ მოთავსების უზრუნველყოფას, ყოველდღიური ლაბორატორიული კვლევებით“, - ნათქვამია ზედამხედველობის ორგანოს განცხადებაში.

ამასთან, აღნიშნულია, რომ კვლევის შედეგებმა COVID-19-ის ორი და რინოვირუსული ინფექციის ორი შემთხვევა გამოავლინა, თუმცა სხვა ინფექციური დაავადებების გამომწვევი პათოგენები არ აღმოჩენილა.

„კონტაქტში მყოფ არცერთ პირს არ აღენიშნებოდა ჯანმრთელობის მდგომარეობის ისეთი ცვლილებები, რომლებიც ინფექციურ დაავადებასთან იქნებოდა დაკავშირებული“, - ნათქვამია განცხადებაში.

ირკუტსკის მახლობლად მდებარე შელეხოვის რაიონის ხელმძღვანელის მოადგილემ ელენა სოფინამ განაცხადა, რომ ე.წ. „საშიში დიაგნოზი“ არ დადასტურებულა. მან დასძინა, რომ პრევენციის მიზნით კარანტინში მოთავსებულთა 60% უკვე გაუშვეს. ადგილობრივი მედიის ცნობით, მანამდე კარანტინში დაახლოებით 200 ადამიანი იმყოფებოდა.