რუსეთი პირველი მაისიდან საკუთარი ტერიტორიის გავლით ყაზახური ნავთობის ტრანზიტს წყვეტს. ნავთობი შემდეგ გერმანიის ქალაქ შვედეთში მდებარე ნავთობგადასამუშავებელ ქარხანას მიეწოდებოდა. ამის თაობაზე Deutche Welle იუწყება.

ინფორმაცია გერმანიის ეკონომიკის სამინისტრომ გაავრცელა. რუსულ მხარეს ამაზე კომენტარი არ გაუკეთებია.

ყაზახური ნავთობი გერმანიაში ნავთობსადენის, „დრუჟბას“ გავლით, რუსეთის, უკრაინის და პოლონეთის ტერიტორიით მიეწოდება. 2025 წელს ყაზახეთმა ამ მარშრუტით 2,146 მლნ ტონა ნავთობის გადაზიდვა განახორციელა, რაც 2024 წელთან შედარებით 44%-ით მეტი იყო. მას შემდეგ, რაც გერმანიამ რუსეთის ენერგომატარებლებზე უარი თქვა, ყველაზე მნიშვნელოვანი მიმწოდებელი ყაზახეთი გახდა.

რუსეთის გავლით ყაზახური ნავთობის მიწოდების შეჩერების შესახებ ინფორმაცია ყაზახეთის ენერგეტიკის მინისტრმა, ერლან აკენჟენოვმაც დაადასტურა. მისი თქმით, რუსულ მხარეს ოფიციალური განცხადება არ გაუვრცელებია, მაგრამ არაოფიციალური წყაროებიდან ყაზახეთმა ეს ინფორმაცია უკვე მიიღო. ყაზახეთის ენერგეტიკის მინისტრმა არ გამორიცხა, რომ ეს ფაქტი რუსეთის ენერგეტიკულ ინფრასტრუქტურაზე უკრაინის საჰაერო იერიშებს უკავშირდება.