შეერთებული შტატები გეგმავს ევროპის აღმოსავლეთ ფლანგზე განლაგებული ჯარისკაცების რაოდენობის შემცირებას, მათ შორის იმ ჯარისკაცების, რომლებიც რუმინეთის მიხაილ კოგალნიჩეანუს საჰაერო ბაზაზე უნდა განთავსდნენ, - განაცხადა რუმინეთის თავდაცვის სამინისტრომ.

რუმინეთის თავდაცვის უწყების ხელმძღვანელის თქმით, გადაწყვეტილება მოსალოდნელი იყო ვაშინგტონის პრიორიტეტების ცვლილებების გათვალისწინებით და რუმინეთში დაახლოებით 1 000 ამერიკელი ჯარისკაცი დარჩება, რაც ხელს შეუწყობს ნებისმიერი საფრთხის შეკავებას და წარმოადგენს აშშ-ის რეგიონული უსაფრთხოებისადმი ერთგულების გარანტიას. სამინისტრომ არ დააკონკრეტა, რამდენ ამერიკელ ჯარისკაცს გაიყვანენ.

პრეზიდენტ დონალდ ტრამპის ადმინისტრაციამ ვაშინგტონის ევროპელ მოკავშირეებს ადრე განუცხადა, რომ მათ მეტი პასუხისმგებლობა უნდა აიღონ საკუთარ უსაფრთხოებაზე, რადგან შეერთებული შტატები უფრო მეტად ფოკუსირებულია საკუთარ საზღვრებსა და ინდო-წყნარი ოკეანის რეგიონზე.

თავდაცვის მინისტრმა იონუტ მოსტეანუმ პრესკონფერენციაზე განაცხადა, რომ ბრიგადას ჯარები რუმინეთში, ბულგარეთში, უნგრეთსა და სლოვაკეთში ჰყავს განლაგებული.

„როდესაც ბრიუსელში ნატოს მინისტრების შეხვედრა გვქონდა, აშშ-ის თავდაცვის მდივანმა, პიტ ჰეგსეთმა ევროპელ პარტნიორებს კიდევ ერთხელ განუცხადა, რომ ახლა, როდესაც ევროპელებმა გააძლიერეს თავიანთი პოზიციები აღმოსავლეთ ფლანგზე და, ზოგადად, ევროპაში და შეთანხმდნენ უკეთ შეიარაღებაზე, ისინი მეტ ყურადღებას მიაქცევენ საკუთარ თავდაცვას. შეერთებული შტატები უფრო მეტად ინდო-წყნარი ოკეანის რეგიონისკენ იქნება მიმართული“, - განაცხადა რუმინეთის თავდაცვის მინისტრმა.