რესპუბლიკელმა კონგრესმენმა ბრაიან ფიცპატრიკმა აშშ-ის პრეზიდენტ დონალდ ტრამპს წერილით მიმართა და მოუწოდა, უკრაინისთვის დახმარების მიწოდების შეჩერებასთან დაკავშირებით კონგრესისთვის სასწრაფო ბრიფინგი ჩაატაროს. წერილის ტექსტი „ამერიკის ხმის“ ყოფილმა ჟურნალისტმა ოსტაპ იარიშმა გამოაქვეყნა.

კონგრესმენმა განაცხადა, რომ შეშფოთებულია იმ ინფორმაციით, რომ შეერთებულმა შტატებმა შეაჩერა უკრაინისთვის უკვე შეთანხმებული დახმარების მიწოდება იმ სიტუაციაში, როდესაც რუსეთი აგრძელებს ზაფხულის შეტევით კამპანიას და აძლიერებს საჰაერო დარტყმებს ზურგში.

„მიუხედავად იმისა, რომ შეერთებულ შტატებს ქვეყნის შიგნით თავდაცვის ინდუსტრიული ბაზის გაძლიერება სჭირდება, ჩვენ ერთდროულად შეგვიძლია და უნდა გავუწიოთ კრიტიკული დახმარება ჩვენს მოკავშირეებს, რომლებიც თავიანთ თავისუფლებას დიქტატორების ბარბაროსული შემოსევებისგან იცავენ. ორივეს არგაკეთება მიუღებელია“, - წერს ფიცპატრიკი.

მან ხაზგასმით აღნიშნა, რომ უკრაინა იბრძვის არა მხოლოდ საკუთარი თავისუფლებისთვის, არამედ მთელი დემოკრატიული სამყაროსთვის.

„ეს კრიტიკული მომენტია: უკრაინის გამბედაობას საპასუხო ქმედებები უნდა მოჰყვეს და შეერთებულმა შტატებმა ლიდერის როლი უნდა შეინარჩუნოს... თავისუფლების დაცვაში ნახევარი ზომები არ შეიძლება იყოს“, - ხაზს უსვამს რესპუბლიკელი.

„პატივისცემით მოვითხოვ თეთრი სახლისა და თავდაცვის დეპარტამენტისგან სასწრაფო ბრიფინგს პენტაგონის მიერ ჩვენი იარაღისა და საბრძოლო მასალის მარაგების ბოლო მიმოხილვის, ასევე, უკრაინისთვის კრიტიკულად და სასიცოცხლოდ მნიშვნელოვანი სამხედრო დახმარების შეჩერების შესახებ გადაწყვეტილებაზე“, - დაასკვნა ფიცპატრიკმა.

როგორც ცნობილია, 1-2 ივლისს ამერიკულმა მედიამ გაავრცელა ინფორმაცია, რომ პენტაგონმა შეაჩერა უკრაინისთვის საჰაერო თავდაცვის ზოგიერთი რაკეტის და სხვა მაღალი სიზუსტის საბრძოლო მასალის მიწოდება, რადგან არსებობს შეშფოთება, რომ აშშ-ის იარაღის მარაგი ძალიან შემცირდა.

უკრაინის თავდაცვის სამინისტრომ განაცხადა, რომ მას არ მიუღია ოფიციალური ინფორმაცია შეთანხმებული თავდაცვითი დახმარების მიწოდების გრაფიკის შეჩერების ან გადახედვის შესახებ.

მოგვიანებით უკრაინის პრეზიდენტმა ვოლოდიმირ ზელენსკიმ განაცხადა, რომ უკრაინა შეერთებულ შტატებთან „სამუშაო დონეზე“ თანამშრომლობს სამხედრო დახმარების მიწოდებასთან დაკავშირებული დეტალების გასარკვევად.