თურქეთის პრეზიდენტმა რეჯეფ თაიფ ერდოღანმა განაცხადა, რომ სურს, კრემლის ლიდერ ვლადიმერ პუტინთან რუსეთ-უკრაინის ომის დასრულების შესახებ მოლაპარაკებები გამართოს მას შემდეგ, რაც ეს საკითხი გასულ კვირას სტამბოლში უკრაინელ კოლეგასთან ვოლოდიმირ ზელენსკისთან შეხვედრისას განიხილა. ამის შესახებ ერდოღანმა ჟურნალისტებს სამხრეთ კორეაში ვიზიტის დროს განუცხადა.

თურქეთის პრეზიდენტმა აღნიშნა, რომ პუტინთან ომის დასრულების მცდელობებს განიხილავს, რათა „ამ საკითხის რუსული ასპექტი შეისწავლოს“.

მან კიდევ ერთხელ დაადასტურა თურქეთის მზადყოფნა, ხელი შეუწყოს რუსეთსა და უკრაინას შორის მოლაპარაკებების გაგრძელებას.

„როგორც თურქეთი, ჩვენ ყველაფერს ვაკეთებთ მშვიდობისკენ გზის გასახსნელად და ამას გავაგრძელებთ. ბატონ ზელენსკისთან ამ შეხვედრის შემდეგ ჩვენ ასევე გვსურს, მოლაპარაკებები გავმართოთ ბატონ პუტინთან, რათა განვიხილოთ ამ საკითხის რუსული ასპექტი. ამასობაში ჩემი კოლეგები, უპირველეს ყოვლისა, საგარეო საქმეთა მინისტრი, მოლაპარაკებებს გამართავენ თავიანთ პარტნიორებთან და, ვიმედოვნებთ, რუსულ მხარეს ამ შეხვედრისთვის მოამზადებენ“, - განაცხადა ერდოღანმა.

პუტინსა და ერდოღანს შორის შესაძლო საუბრის შესახებ დასმულ შეკითხვაზე კრემლის პრესმდივანმა დიმიტრი პესკოვმა განაცხადა, რომ ჯერჯერობით კონკრეტული გეგმები არ არსებობს, თუმცა, საჭიროების შემთხვევაში, მისი ორგანიზება მოკლე ვადებშია შესაძლებელი.