აშშ-ის ყოფილმა ვიცე-პრეზიდენტმა მაიკ პენსმა გააკრიტიკა აშშ-ის პრეზიდენტი დონალდ ტრამპი უკრაინისადმი „არასტაბილური“ მხარდაჭერის გამო.

„თუ ბოლო სამმა წელმა რამე გვასწავლა, ეს ის არის, რომ ვლადიმერ პუტინს მშვიდობა არ სურს, მას უკრაინა სურს. და ის ფაქტი, რომ ჩვენ თითქმის ორი თვეა ვიცავთ ცეცხლის შეწყვეტის შეთანხმებას, რომელზეც უკრაინა დათანხმდა და რუსეთი აგრძელებს გადადებას და საბაბების მოძიებას, ამ აზრს ადასტურებს“, - განაცხადა პენსმა CNN-თან ინტერვიუში.

პენსმა, ასევე, აღნიშნა, რომ პუტინს „მხოლოდ ძალის“ ესმის, ამიტომ აშშ-მა ნათლად უნდა გამოხატოს უკრაინისადმი მუდმივი მხარდაჭერა.

„სწორედ ამიტომ, ამ მომენტში ჩვენ ნათლად უნდა განვაცხადოთ, რომ შეერთებული შტატები გააგრძელებს ლიდერობას უკრაინისთვის სამხედრო მხარდაჭერის გაწევაში, რომელიც მას სჭირდება რუსული აგრესიის მოსაგერიებლად და სამართლიანი და მდგრადი მშვიდობის მისაღწევად“, - განაცხადა მან.

პენსმა, ასევე, დასძინა, რომ მისი აზრით, ტრამპის ადმინისტრაციის მიერ ბოლო თვეებში გამოვლენილმა „არასტაბილურმა მხარდაჭერამ“ „მხოლოდ გაამხნევა რუსეთი“.

ის დარწმუნებულია, რომ თუ პუტინი უკრაინაში წარმატებას მიაღწევს, მაშინ მხოლოდ დროის საკითხია, სანამ პუტინი ნატოს წევრ ქვეყანაში შეიჭრება და შემდეგ „ჩვენს ფორმიან კაცებსა და ქალებს მასთან ბრძოლა მოუწევთ“:

პენსმა თებერვალში ტრამპს, ვიცე-პრეზიდენტ ჯ. დ. ვენსსა და უკრაინის პრეზიდენტ ვოლოდიმირ ზელენსკის შორის ოვალურ კაბინეტში გამართულ საკამათო შეხვედრას „სამწუხარო“ უწოდა.

ამავდროულად, იგი მიიჩნევს, რომ ტრამპსა და ზელენსკის შორის ვატიკანში შეხვედრამ „როგორც ჩანს, დიალოგი განაახლა“.

მან, ასევე, დასძინა, რომ გასულ კვირას უკრაინასა და შეერთებულ შტატებს შორის ხელმოწერილი წიაღისეულის შესახებ შეთანხმება „მოსკოვს განსაცვიფრებელ სიგნალს უგზავნის, რომ ამერიკა და უკრაინა აქ არიან ხანგრძლივი ვადით“.