რუსეთის პრეზიდენტის პრესმდივანმა დიმიტრი პესკოვმა განაცხადა, რომ ინდოეთის მიერ რუსულ ნავთობზე უარის თქმის თაობაზე კრემლში არაფერი იციან. ამის შესახებ „მედუზა“ იუწყება.

2 თებერვალს აშშ-ის პრეზიდენტმა დონალდ ტრამპმა განაცხადა, რომ ინდოეთის ხელისუფლება რუსული ნავთობის შეძენაზე უარს აცხადებს და უფრო მეტ ნავთობს შეერთებული შტატებისგან იყიდის.

„ჩვენ ამ საკითხზე დელის ოფიციალური განცხადებები არ გვსმენია“, - განუცხადა პესკოვმა ჟურნალისტებს. მისივე თქმით, კრემლი სიტუაციას აკვირდება და ახალ ამბებს თვალყურს ადევნებს.

„ჩვენ პრეზიდენტ ტრამპის განცხადებებს ძალზე ყურადღებით ვისმენთ. მათ ვაფიქსირებთ, ვაანალიზებთ და ასევე პატივისცემით ვექცევით აშშ - ინდოეთის ორმხრივ ურთიერთობებს. მაგრამ არანაკლებ მნიშვნელოვანია ჩვენი და ინდოეთის სტრატეგიული პარტნიორობის განვითარება, ესეც ძალზე მნიშვნელოვანია ჩვენთვის. მომავალშიც ჩვენ დელისთან ორმხრივი ურთიერთობების განვითარებას ვაპირებთ“, - განაცხადა რუსეთის პრეზიდენტის პრესმდივანმა.

ცნობისთვის, ინდოეთი და ჩინეთი ამჟამად რუსული ნავთობის უმსხვილესი იმპორტიორები არიან მსოფლიოში.