ნატოს ქვეყნები უკრაინისთვის 70 მილიარდი ევროს ოდენობის სამხედრო დახმარების ახალი პაკეტის გამოყოფის იდეას განიხილავენ, რომლის შესახებაც შესაძლოა, მომავალ თვეში თურქეთის დედაქალაქ ანკარაში დაგეგმილ ალიანსის სამიტზე გამოაცხადონ. ამის შესახებ ინფორმაციას Politico ავრცელებს. 

ნატოს ოთხი დიპლომატის თქმით, ასეთი წინადადება გერმანიამ მაისში წამოაყენა. დაფინანსების გარდა, წინადადება მოიცავს ახალ მექანიზმს, რათა შენატანების გაკონტროლება უფრო გამჭვირვალე იყოს.

ეს ხდება ზოგიერთი ქვეყნის პრეტენზიების ფონზე, რომ ისინი კიევის მხარდასაჭერად არაპროპორციულად ხარჯავენ.

„მთავარია, ანკარისგან მტკიცე ვალდებულება მივიღოთ, რომ უკრაინისთვის აუცილებელი მხარდაჭერა მდგრადი და უფრო სამართლიანი გზით გავაგრძელოთ“, - დასძინა ნატოს მეხუთე უფროსმა დიპლომატმა.

გამოცემის ცნობით, 70 მილიარდი ევროს ოდენობის დაფინანსება მხოლოდ ახალი სახსრებისგან არ შედგება. დაახლოებით 30 მილიარდი ევრო ევროკავშირის მიერ უკრაინისთვის უკვე შეთანხმებული ორწლიანი 90 მილიარდი ევროს სესხიდან გამოიყოფა, ხოლო დამატებით 40 მილიარდი ევრო ორმხრივი დახმარების პროგრამების მეშვეობით გამოიყოფა.

თუმცა, ზოგიერთი შიშობს, რომ ქვეყნებმა შესაძლოა, წვლილის შეტანა ნაკლებად საჭიროდ მიიჩნიონ, თუ ევროკავშირის დაფინანსებას დაეყრდნობიან. 

Politico-მ ასევე აღნიშნა, რომ უკრაინის მხარდაჭერა ერთ-ერთი მთავარი საკითხი იქნება, რომელიც 7-8 ივლისს ნატოს ლიდერების სამიტზე განიხილება.

თავის მხრივ, ნატოში უკრაინის ელჩმა ოლენა გეტმანჩუკმა გამოცემას განუცხადა, რომ ნებისმიერი ახალი ვალდებულება უნდა იყოს ორიენტირებული კიევის პრიორიტეტებზე, როგორებიცაა საჰაერო თავდაცვა, ინვესტიციები, დრონებისა და რაკეტების წარმოება და შორი მოქმედების საბრძოლო მასალა.