გავრცელებული ცნობების თანახმად, უკრაინის ფრონტის ხაზზე მყოფი ჯარისკაცები შიმშილობენ და იძულებულნი არიან წვიმის წყალი დალიონ, - ამის შესახებ Politico წერს.

როგორც გამოცემა წერს, გენერალურმა შტაბმა ერთი მეთაური თანამდებობიდან გაათავისუფლა და მეორე დააქვეითა მას შემდეგ, რაც ინტერნეტში გამოქვეყნდა გამხდარი ჯარისკაცების ფოტოები. ჯარისკაცები მე-14 ბრიგადაში მსახურობდნენ, ხოლო ორ ოფიცერს, რომლებიც პასუხისმგებელნი იყვნენ მათზე, ბრალი დასდეს სიტუაციის შესახებ უმაღლესი სარდლობისთვის ინფორმაციის შეუტყობინებლობაში.

გავრცელებული ცნობების თანახმად, ხარკოვის რეგიონში, მდინარე ოსკილის გადაღმა მდებარე ბრძოლის ფრონტზე განლაგებული მეორე ბატალიონის ჯარისკაცები წვიმის წყალს სვამდნენ და შიმშილისგან გონებას კარგავდნენ.

„მოწინააღმდეგის სისტემატურმა საჰაერო და სარაკეტო დარტყმებმა მდინარე ოსკილზე არსებულ გადასასვლელებზე მნიშვნელოვნად გაართულა ქალაქ კუპიანსკის მიმდებარედ მყოფი ჯარების ლოგისტიკური უზრუნველყოფა. აქ ჩვენი ქვედანაყოფების მომარაგება მცირე ზომის მცურავი საშუალებებითა და მძიმე უპილოტო საფრენი აპარატებით ხორციელდება“, - ნათქვამია გენერალური შტაბის მიერ გავრცელებულ განცხადებაში.

მედიის ცნობით, მიუხედავად იმისა, რომ მე-14 ბრიგადის მეთაურები საჰაერო თავდაცვის გაძლიერებასა და ფრონტის ხაზზე მყოფი ჯარების დრონების დარტყმებისგან დაცვაზე მუშაობდნენ, მათ ვერ შეძლეს სამხედრო ხელმძღვანელობისთვის ადგილზე არსებული რეალური მდგომარეობის შესახებ ინფორმაციის მიწოდება.

გენერალურმა შტაბმა განაცხადა, რომ ბრიგადის სურსათით მომარაგების პრობლემების შესახებ არაფერი იცოდა და დაადასტურა, რომ მეთაურების ქმედებებთან დაკავშირებით გამოძიება დაიწყო. რაც შეეხება დაზარალებულ ჯარისკაცებს, „როგორც კი სიტუაცია საშუალებას მოგვცემს, ისინი ევაკუირებულნი იქნებიან“, - განაცხადა გენერალურმა შტაბმა.

უკრაინის გაერთიანებული ძალების ოპერატიულმა ჯგუფმა - არმიის ქვედანაყოფმა, რომელიც გასულ წელს ხარკოვის ოლქში ჯარების სამართავად შეიქმნა, შექმნილ ვითარებას „საშინელი მართვის სირცხვილი“ უწოდა.

„ეს არის კორპუსის დონეზე მიღებული გრძელვადიანი მმართველობითი გადაწყვეტილებებისა და ქვედანაყოფებთან მისი ურთიერთქმედების შედეგი. ამავდროულად, სხვადასხვა დონეზე ისმოდა მოხსენებები იმის შესახებ, რომ სიტუაცია ორგანიზებული და კონტროლირებადი იყო, რაც, როგორც ყველამ ნახა, რეალობას არ შეესაბამება“, - ნათქვამია უკრაინის გაერთიანებული ძალების ოპერატიული ჯგუფის მიერ გავრცელებულ განცხადებაში.

უკრაინის გაერთიანებული ძალების ოპერატიული ჯგუფის მიერ გავრცელებულ ინფორმაციაში ნათქვამია, რომ  ისინი აქტიურად მუშაობენ პრობლემის გადასაჭრელად და მე-14 ბრიგადის პოზიციებზე დაუყოვნებლივ იგზავნება დამატებითი მარაგი.

მე-14 ბრიგადის პრესსამსახურმა განაცხადა, რომ „ახლად დანიშნული ბრიგადის მეთაური, პოლკოვნიკი ტარას მაქსიმოვი, ინტენსიურ ზომებს იღებს სიტუაციის გამოსასწორებლად“.

„ყველა სამხედრო მოსამსახურის სიცოცხლე და ჯანმრთელობა პრიორიტეტია! სამხედრო ნაწილის სარდლობა კონტაქტზეა სამხედრო მოსამსახურეების ოჯახებთან. სიტუაცია ბრიგადის მეთაურის განსაკუთრებული კონტროლის ქვეშ რჩება, ვიდრე ის სრულად არ მოგვარდება“, - აცხადებენ პრესსამსახურში.