სლოვაკეთის პრემიერ-მინისტრმა რობერტ ფიცომ რუსეთისა და აშშ-ის პრეზიდენტების, ვლადიმერ პუტინისა და დონალდ ტრამპის ალასკაში გამართული სამიტი შეაქო და აღნიშნა, რომ შეხვედრამ წაშალა ომის შესახებ ერთადერთი სავალდებულო პოზიცია, რომელსაც ბაიდენის ადმინისტრაცია მტკიცედ უჭერდა მხარს. ამის შესახებ Politico წერს.

ვიდეომიმართვაში ფიცომ ისაუბრა უკრაინის წინააღმდეგ გაჩაღებული ომის „ძირეულ მიზეზებზე“, ასევე რუსეთისთვის უსაფრთხოების გარანტიების უზრუნველყოფის აუცილებლობაზე.

„უკრაინაში ომს ისტორიული ფესვები აქვს და ჩვენ თანაბრად უნდა ვისაუბროთ როგორც უკრაინის, ასევე რუსეთის უსაფრთხოების გარანტიებზე“, - განაცხადა სლოვაკეთის პრემიერ-მინისტრმა Facebook-ზე გამოქვეყნებულ ვიდეოში.

გამოცემა იხსენებს, რომ პუტინი რეგულარულად საუბრობს მის მიერ დაწყებული ომის „ძირეულ მიზეზებზე“, ამ ფრაზით ამართლებს თავის სრულმასშტაბიან შეჭრას, რადგან, კრემლის ლიდერის აზრით, უკრაინა საფრთხეს უქმნიდა რუსეთის უსაფრთხოებას.

როგორც Politico იუწყება, კრემლის ლიდერმა ეს ფრაზა ბოლოს 15 აგვისტოს, ალასკაში ტრამპთან შეხვედრის შემდეგ გამოიყენა, სადაც უკრაინის ნატოში გაწევრიანების ამბიციებსა და ცრუ მტკიცებებზე მიუთითა, რომ უკრაინის მთავრობას ნაცისტები მართავენ.

ფიცო, თავის მხრივ, ამტკიცებს, რომ ალასკის სამიტმა „რამდენიმე პრობლემის გადაჭრა შესაძლებელი გახადა“.

„მან პირველად უარყო უკრაინაში სამხედრო კონფლიქტის შავ-თეთრი ხედვა“, - აღნიშნა სლოვაკეთის პრემიერმა. 

გარდა ამისა, მისი თქმით, ტრამპისა და პუტინის პირისპირ შეხვედრამ „რუსეთსა და შეერთებულ შტატებს შორის ურთიერთობების ნორმალიზების დაწყებას ხელი შეუწყო“.

„შეხვედრამ, როგორც ჩანს, წაშალა ომის შესახებ ერთადერთი სავალდებულო პოზიცია, რომელსაც ასე მტკიცედ უჭერდა მხარს ბაიდენის ადმინისტრაცია და რომელსაც კვლავაც უჭერს მხარს ევროკავშირის გავლენიანი მოთამაშეების ჯგუფი“, - აღნიშნა ფიცომ.

სამიტი „სარკეა იმ ევროპელი ლიდერებისთვის, რომლებსაც ევროპასა და რუსეთს შორის ახალი რკინის ფარდის აღმართვა სურთ“, - განაცხადა ფიცომ და აღნიშნა, რომ რუსეთის ხელმძღვანელობის წინააღმდეგ სანქციები საქმეს არ დაეხმარება.