ფინეთის საგარეო საქმეთა მინისტრი ელინა ვალტონენი მიიჩნევს, რომ რუსეთის პრეზიდენტის მიერ ევროპის მიმართ გაჟღერებული მუქარა უფრო დაშინების ღონისძიებას წარმოადგენს. ამის შესახებ მან ბრიუსელში ნატოს საგარეო საქმეთა მინისტრების შეხვედრის წინ განაცხადა. 

კერძოდ, ვალტონენმა კომენტარი გააკეთა კრემლის ლიდერის 2 დეკემბერს გაკეთებულ განცხადებებზე, რომ ევროპა, სავარაუდოდ, ხელს უშლის მშვიდობის მიღწევას და რომ „თუ ევროპას ომი სურს, მაშინ რუსეთი მზადაა“.

„ეს რუსული რიტორიკაა, რომელსაც რუსეთის ფედერაცია ზეწოლისთვის იყენებს და ეს ზედმეტად სერიოზულად არ უნდა აღვიქვათ“, - აღნიშნა ელინა ვალტონენმა.

მან დასძინა, რომ ევროპისა და ნატოს ქვეყნებს კარგი თავდაცვითი შესაძლებლობები აქვთ და ახლა ისინი მათ აძლიერებენ.

„ამის ნაცვლად, რუსეთი სასოწარკვეთილად ეძებს გზებს, რათა თავი დააღწიოს ომს, რომელიც მას არასდროს უნდა დაეწყო და რომელიც სრულიად მცდარ ვარაუდებს ეფუძნებოდა“, - აღნიშნა ფინეთის საგარეო საქმეთა მინისტრმა.

მან კიდევ ერთხელ დაადასტურა ფინეთის პოზიცია, რომ ომის დასრულების პირველი ნაბიჯი უნდა იყოს საბრძოლო მოქმედებების შეჩერება, ან სულ მცირე ენერგეტიკულ ინფრასტრუქტურაზე დარტყმების შეჩერება.