ფინეთის პრეზიდენტმა ალექსანდრ სტუბმა დავოსში, მსოფლიო ეკონომიკური ფორუმის ყოველწლიურ შეხვედრაზე ევროპის თავდაცვისუნარიანობის შესახებ პანელური დისკუსიის დროს განაცხადა, რომ, მისი აზრით, ევროპა თავდასხმისგან თავის დასაცავად მზადაა.

ნატოს გენერალურ მდივან მარკ რუტესთან და პოლონეთის პრეზიდენტ კაროლ ნავროცკისთან ერთად მჯდომმა სტუბმა თავისი მოსაზრება გამოთქვა იმის შესახებ, თუ როგორ შეიძლება გამოიყურებოდეს ნატო აშშ-ის დახმარების გარეშე.

„შეუძლია თუ არა ევროპას საკუთარი თავის დაცვა? ჩემი პასუხი ცალსახად დადებითია“, - აღნიშნა სტუბმა.

ფინეთის პრეზიდენტმა თავისი ერის მაგალითი მოიყვანა ნატოს უფრო ფართო სამხედრო პერსპექტივების წარმოსაჩენად.

„ჩვენ გვაქვს სავალდებულო სამხედრო სამსახური. ერთმა მილიონმა გაიარა ეს. ჩვენ შეგვიძლია რამდენიმე კვირაში 280 000 ჯარისკაცის მობილიზება. ჩვენ გვაქვს 62 ერთეული F-18“, - განმარტა სტუბმა.

მან ხაზგასმით აღნიშნა, რომ ფინეთს პოლონეთთან ერთად ევროპაში ყველაზე დიდი არტილერია აქვს, მათ შორის ხმელეთზე, ზღვაზე და ჰაერში გამოსაყენებელი შორი მოქმედების რაკეტები. „შეუძლია თუ არა ფინელ სამხედროებს, თავი დაიცვან რუსული თავდასხმისგან... დიახ“, - განაცხადა პრეზიდენტმა.

თუმცა სტუბმა აღნიშნა, რომ ერის ეფექტურობა ომში არ შეიძლება განისაზღვროს მხოლოდ მისი სამხედრო შესაძლებლობებით, ან არსენალით. „ომებს ბრძოლის ველზე აწარმოებ, მაგრამ მათ სახლში იგებ... ყველამ მეტი ყურადღება უნდა გავამახვილოთ სამოქალაქო მხარის ყოვლისმომცველ უსაფრთხოებაზე“, - აღნიშნა ფინეთის ლიდერმა. 

„სწორედ ამიტომ გვაქვს სამოქალაქო თავშესაფრები 4.4 მილიონი ფინელისთვის“, - დასძინა მან და აღნიშნა, რომ ფინეთს ასევე აქვს მარაგი საკვების, ენერგიისა და ელექტროენერგიის დეფიციტის თავიდან ასაცილებლად.