ეგრეთ წოდებული „მსურველთა კოალიცია“ დათანხმდა, რომ მინიმუმ ერთ ევროპელ ლიდერს მოუწევს რუსეთთან მოლაპარაკება რაღაც მომენტში, განაცხადა ფინეთის პრეზიდენტმა ალექსანდრე სტუბმა. ამის შესახებ Reuters იუწყება. 

სტუბის თქმით, საფრანგეთი ან დიდი ბრიტანეთი კრემლის ლიდერ ვლადიმერ პუტინთან „მსურველთა კოალიციის“ სახელით ისაუბრებს. 

„ხუთშაბათს პარიზში კოალიციასთან ჩვენი დისკუსიის დროს ჩვენ ვაღიარეთ რეალობა, რომ ერთ-ერთმა ევროპელმა ლიდერმა რაღაც მომენტში რუსეთთან მოლაპარაკებები უნდა დაიწყოს“, - განმარტა მან.

ფინეთის პრეზიდენტმა მანამდე თავის ქვეყანას მოუწოდა, „მორალურად მოემზადოს“ იმისთვის, რომ რუსეთთან ურთიერთობა ადრე თუ გვიან აღდგება. ამასთან, სტუბმა აღნიშნა, რომ ვერ ხედავს ამის შესაძლებლობას, სანამ რუსეთის სრულმასშტაბიანი ომი უკრაინის წინააღმდეგ არ დასრულდება.

ცნობისთვის, „მსურველთა კოალიცია“ 30-მდე ქვეყანას აერთიანებს, რომლებმაც გამოთქვეს მზადყოფნა, გაგზავნონ თავიანთი ჯარები უკრაინაში პოტენციური ცეცხლის შეწყვეტის მონიტორინგისთვის, ან ასეთი მისიის მხარდასაჭერად.