კრემლის პრესმდივნის დიმიტრი პესკოვის განცხადებით, სანამ კიევი შესაბამის გადაწყვეტილებებს არ მიიღებს, რუსეთი სპეციალურ სამხედრო ოპერაციას გააგრძელებს. 

„სანამ კიევის რეჟიმი შესაბამის გადაწყვეტილებებს არ მიიღებს, სპეციალური სამხედრო ოპერაცია გრძელდება“, -აღნიშნა პესკოვმა. 

პესკოვმა ასევე მადლობა გადაუხადა შეერთებულ შტატებს უკრაინასთან სამმხრივი მოლაპარაკებების ორგანიზებისთვის. 

არაბეთის გაერთიანებული საამიროების დედაქალაქ აბუ-დაბიში სამმხრივი მოლაპარაკების მორიგი რაუნდი დაიწყო, რომელშიც უკრაინის, რუსეთის და აშშ-ის წარმომადგენლები მონაწილეობენ. 

„მოლაპარაკება კვლავ სამმხრივ ფორმატში მიმდინარეობს - უკრაინა, აშშ და რუსეთი. შემდეგ დაიწყება მუშაობა ჯგუფებში ცალკეული მიმართულებების მიხედვით და, საბოლოოდ, პოზიციების შეჯერების ერთობლივი შეხვედრა“, - განაცხადა უკრაინის დელეგაციის ხელმძღვანელმა, უკრაინის უსაფრთხოების და თავდაცვის საბჭოს მდივანმა რუსტემ უმეროვმა.