უნგრეთის პრემიერ-მინისტრმა ვიქტორ ორბანმა თავისი გადაწყვეტილება სისხლის სამართლის საერთაშორისო სასამართლოდან (ICC) გასვლის შესახებ ინსტიტუტის „პოლიტიზაციით“ ახსნა. ამის თაობაზე ორბანმა ბუდაპეშტში ისრაელის პრემიერ-მინისტრ ბენიამინ ნეთანიაჰუსთან გამართულ პრესკონფერენციაზე განაცხადა, იუწყება უნგრული მედია. 

ვიქტორ ორბანის თქმით, ის ICC-ის საკითხებში „ექსპერტია“, რადგან თავად იყო პრემიერ-მინისტრი, რომელმაც  სისხლის სამართლის საერთაშორისო სასამართლოში გაწევრიანების შესახებ დოკუმენტს 2001 წელს ხელი მოაწერა. ორბანმა დასძინა, რომ ახლა უნგრეთი სასამართლოს დატოვებს. როგორც მედია იუწყება, პრესკონფერენციის ზოგიერთი მონაწილე, მათ შორის ნეთანიაჰუ, ამ სიტყვებს ტაშით მიესალმა.

უნგრეთის პრემიერის თქმით, ბოლო წლებში ის უკვე აღარ არის მიუკერძოებელი სასამართლო, არამედ „პოლიტიკური სასამართლოა“.

ორბანმა ხაზგასმით აღნიშნა, რომ „დემოკრატიული სამართლებრივი სახელმწიფო“, როგორიც უნგრეთია, „ამაში მონაწილეობას ვერ მიიღებს“.

მან დასძინა, რომ ICC პოლიტიკურ ინსტრუმენტად იქცა და ამიტომ უნგრეთი აღარ იქნება მისი მონაწილე. 

თავის მხრივ, ნეთანიაჰუმ უნგრეთის ICC-დან გასვლას „გაბედული ნაბიჯი“ უწოდა და სასამართლო „კორუმპირებულ ორგანიზაციად“ მოიხსენია, რომელიც „დემოკრატიას ემუქრება“.

„თქვენ ხართ პირველი სახელმწიფო, რომელმაც ეს ლპობა უკან დატოვა... ანტისემიტიზმის წინაშე არაჩვეულებრივი სიმამაცე გამოიჩინეთ“, – განაცხადა მან.